22 маусым күні Жамбыл облысы әкімінің атынан жауап хат келіп түсті. Осыған орай, қойылған сауал мен әкімнің жауабымен таныс болсаңыздар:
- Тараз қаласы мен аудан əкімдерінің, басқармалардың үздіктері мен аутсайдерлерін көрсетіп берсеңіз?
Басшылық қызметте отырған азаматтар мен азаматшалардың жұмысына қанағаттанарлық баға беремін. Әрине, үздіксіз жұмыс жүрген жерде қателіктер де болатыны заңдылық. Алайда жүктелген тапсырманы уақытылы әрі сапалы орындайды. Ешқайсысын бөліп жара алмаймын.
- Туризм саласының дамуына ең қажеттісі — жол. “Алмалы ресорт” пен “Көксай” демалыс орындарына асфальт жол қашан салынады?
Қазіргі кезде Жуалы ауданы әкімдігімен «Koksai Resort» демалыс аумағына алып баратын 18 км автожолын аудан әкімдігі меншігіне алу жұмыстары жүргізіліп, мемелекеттік жер актісі әзірленуде (жергілікті бюджеттен қаражат қарастырып, автожол құрылысын жүргізу үшін Қазақстан Республикасының 2001 жылғы 17 шілдедегі N 245 «Автомобиль жолдары туралы» Заңына сәйкес жүргізілетін процедуралар). Автожол мемлекет меншігіне алынғаннан кейін, жолдың жобалық сметалық құжаттамасы әзірленеді. 18 км автожолдың құрылысын жүргізу қомақты қаражатты қажет ететіні белгілі. Сондықтан, аталған жолды (қаражат көзінің көлеміне байланысты) 2-3 жылға бөліп салу жоспарланып отыр.
Жамбыл ауданы аумағында орналасқан «Алмалы resort» демалыс орнына баратын 12 км жолдың 5,5 км Байзақ ауданында, 6,5 км Жамбыл ауданының аумағында орналасқан. Қазіргі кезде 12 км жолды Жамбыл ауданы әкімдігінің меншігіне алу жұмыстары жүргізілуде. Жол, заң талаптарына сәйкес, мемлекет меншігіне алынғаннан кейін, оның жобалық сметалық құжаттамасы әзірленеді. Жобалық сметалық құжаттамада анықталған қаражат көлеміне байланысты, автожол құрылысын жүргізу мақсатында жергілікті бюджеттен қаражат қарастыру жоспарланып, кезең-кезеңімен жүзеге асырылады.
- Облыс басқарғаныңызға бір жылдан асты. Бір жыл ішінде Сіздің қарамағыңыздағы үш əкім орынбасары, 7 əкім, 17 басқарма басшысы ауысты. Осылардың ішінде қойылған мақсаттарды жақсы орындап жатқан басшыларды атап өтсеңіз.
Барлық деңгейдегі басшылар барынша меритократия қағидаты бойынша тағайындалды. Жалпы басшылық құрамға қойылатын талап жоғары. Мен әрдайым сапалы әрі уақытылы жұмысты талап етемін. Қазіргі таңда берілген тапсырманы орындамай жатқан басшылар жоқ.
- Сіз баяндамаңызда Тараз қаласының бес аумағына таза ауыз кіргізіледі дедіңіз. Оларды атап өтсеңіз жəне “Қайнар” алқабына нақты таза ауыз қашан жетеді?
Тараз қаласындағы Көлтоған, Казарма, Шөлдала, Құмшағал, 28 саяжай, Шалғай Қарасу 1-7, Родничок, Мичуринец, Қайнар, Ақжол алқаптары орталықтандырылған ауыз сумен қамтылмаған. Қазіргі таңда 5 тұрғын алқаптың (Көлтоған, Казарма, Шөлдала, Құмшағал, 28 саяжай) құрылыс жұмыстары жүргізілуде. Жыл соңына 4 тұрғын алқаптың (Көлтоған, Казарма, Шөлдала, Құмшағал) құрылыс жұмыстарын аяқтап пайдалануға беру жоспарланса, 1 тұрғын алқаптың құрылысы (28 саяжай) қаржыландыру жоспарына сәйкес 2024 жылы аяқталады. Бұдан бөлек, Тараз қаласында 5 тұрғын алқаптың (Шалғай Қарасу 1-7, Родничок, Мичуринец, Қайнар, Ақжол) жобалық-сметалық құжаттамалары әзірленіп, 2024-2026 жылдарға арналған республикалық бюджетке ұсынылды. Аталған жобалар республикалық бюджет комиссиясы тарапынан қолдау тапқан жағдайда, 2024 жылы мемлекеттік сатып алу рәсімдерінен кейін құрылыс жұмыстары басталатын болады.
- “Халық үніне құлақ асатын мемлекет” қағидасы бойынша апта сайын аудандарды аралап жүрсіз. Бірақ оның анонстары шағарылмайды. Тəуелсіз БАҚ-қа хабарланбайды. Анонстар бола ма? Кестесі əлеуметтік желілерге салына ма?
Мемлекет басшысының «Әкімдердің халықпен кездесулерін өткізу туралы» Жарлығына сәйкес, облыс әкімі ретінде 2022 жылы 34, ал 2023 жылы 35 елді мекенде кездесу өткіздім. Мұндағы мақсат – халықтың мұң-мұқтажын назарға алу. Кездесулердің барлығы алдын-ала жергілікті ресми БАҚ-та (Ақ жол, Знамя труда) жарияланады.
ҚР Премьер-Министрі Әлихан Смайылов Инвестициялық штаб отырысын өткізді, онда негізгі капиталға инвестициялар (НКИ) және тікелей шетелдік инвестициялар (ТШИ) тарту барысы қаралған болатын. Ұлытау және Жамбыл облыстары өткен жылы да жоспарды орындамаған. Аталған облыстардың әкімдері бұған дейін Инвестициялық штаб отырысында жағдайды биыл түзейміз деп уәде берген болатын. Бірақ, көріп отырғанымыздай, бұл өңірлер барлық облыстың ішінде ең соңғы орындарда қалып отыр деген болатын Үкімет басшысы.
