Жас жұбайлардың үйлену тойы 15 тамызда Стамбұлда өтті. Ал бұл қуанышты жаңалықтың алдында Қазақстанда қазақтың дәстүрлі «құда түсу» және «сырға салу» рәсімдері жасалған.
Арсен Томский өзінің қуанышын әлеуметтік желідегі парақшасында бөлісіп, жаңалығын әдеттегідей әзілмен жеткізді.
«Қазақ еліне +1 күйеу бала» деп жазды кәсіпкер.
Осылайша, 52 жастағы Арсен Томскийдің жеке өміріндегі жаңа кезең басталды. Ал оның таңдауы Қазақстанның қоғамдық өмірі мен қала дамуы саласында өзіндік орны бар Камила Лұқпановаға түсті.
Арсен Томский мен Камила Лұқпанованың қарым-қатынасы туралы ақпарат алғаш рет 2025 жылы кеңінен тарай бастады. Ал биыл жазда кәсіпкер өзінің сүйіктісіне ұсыныс жасағанын жариялады.
Мамыр айының соңында Камила Лұқпанованың туған қаласы Оралда екі жақтың туыстары бас қосып, қазақтың дәстүрлі құда түсу және сырға салу рәсімдерін өткізді. Томский бұл күннің өзі үшін ерекше болғанын айтып, туыстар, достар, балалар, музыка және ұлттық дәстүрлер тоғысқан жылы атмосфераны атап өткен.
Кәсіпкер сол кезде Камиланың бойындағы қасиеттерді де ерекше бағалады. Оның айтуынша, Камиламен бірге өткізген уақыт ішінде өзі көп нәрсеге жаңаша қарап, өміріне маңызды өзгерістер енген.
Болашақ келіннің туған жерінде құда түсу рәсімінің өтуі де көпшілік назарын аударды. Өйткені халықаралық деңгейдегі кәсіпкердің қазақтың салт-дәстүрін қабылдап, оны өзінің отбасылық өміріндегі маңызды кезеңмен байланыстыруы әлеуметтік желі қолданушыларының қызығушылығын арттырды.
Камила Лұқпанова – Қазақстанда қала құрылысы, туризм, қоғамдық кеңістіктер мен жобаларды дамыту бағыттарында еңбек етіп жүрген кәсіби маман.
Ол Almaty Tourism Bureau ұйымын басқарған. Оның кәсіби қызметінің бір бағыты Алматының туристік әлеуетін халықаралық деңгейде таныту және қаланың тартымды бейнесін қалыптастыру болды.
Камиланың жеке парақшасындағы мәліметке сәйкес, ол КИМЭП университеті мен Уорик университетінде білім алған, сонымен қатар Лондон экономика және саясаттану мектебінде оқыған. Ол қалаларды дамыту, тұрақты даму, шығармашылық жобалар және қоғамдық кеңістіктер саласында жұмыс істейді.
Камила сонымен бірге TANA қорын құрған. Қордың негізгі бағыттарының бірі – қоғамдық кеңістіктерді жаңғырту және адамдар үшін жайлы орта қалыптастыру.
Бұған дейін оның Алматыдағы туристік ақпарат орталығын басқарғаны да белгілі. 2023 жылдан бастап осы бағытта жұмыс істеген Лұқпанова 2025 жылы ұйымнан кеткенін хабарлаған.
Британдық кеңестің Қазақстандағы түлектерге арналған бағдарламасында Камила Лұқпанова мәдениет пен шығармашылық саласындағы маман ретінде аталып, оның Алматыдағы кітапханаларды жаңғырту және Қазақстан өңірлеріндегі қоғамдық кеңістіктерді дамыту жобаларына қосқан үлесі атап өтілген.
Арсен Томскийдің өмірбаяны да ерекше. Ол 1973 жылы Якутскіде дүниеге келген. Математика саласында білім алған кәсіпкер алғашқы еңбек жолын ақпараттық технологиялармен байланыстырған.
Кейін ол интернет және бағдарламалық қамтамасыз ету саласында бірнеше жоба жасап, кәсіпкерлікпен айналыса бастады. Оның аты бүкіл әлемге inDrive сервисі арқылы танылды.
Компанияның тарихы да кәдімгі такси қызметінен басталған жоқ.
2012 жылы Якутскіде қатты аяз кезінде такси бағасының күрт өсуіне наразы болған жергілікті тұрғындар әлеуметтік желі арқылы өзара жүргізушілер тобын құрған. Кейін бұл бастама Арсен Томскийдің технологиялық жобасына айналып, жүргізуші мен жолаушының бағаны тікелей келісу қағидатына негізделген сервис қалыптасты.
Ал 2014 жылы компанияның алғашқы халықаралық қадамы Қазақстанда жасалды. Астана inDrive-тың шетелдегі алғашқы нарығына айналды. Кейін сервис Латын Америкасына, Африкаға, Азияға және басқа да өңірлерге тарады.
Бүгінде бұл сала тек такси шақыру қызметімен шектелмейді. Компания қалааралық тасымал, курьерлік жеткізу, жүк тасымалы және тұрмыстық қызметтер секілді бағыттарды да дамытып отыр.
Компанияның ресми мәліметіне сәйкес, қазіргі уақытта қызмет 48 елдегі 1200-ден астам қалада жұмыс істейді, ал қолданбаны орнату саны 400 миллионнан асқан. Компанияның құны 1,23 миллиард долларға бағаланған. Арсен Томский компанияның негізін қалаушысы әрі бас атқарушы директоры болып қала береді.
Арсен Томскийдің Қазақстанмен байланысы соңғы жылдары айтарлықтай күшейді. Компания 2022 жылы өз жұмысын Қазақстанға қайта бағыттап, Алматыда ірі операциялық орталығын орналастырды. Ал Томскийдің өзі Қазақстан азаматтығын 2023 жылдың соңында алды. Қазақстан компанияның халықаралық дамуы басталған ел ғана емес, бүгінде оның маңызды операциялық орталықтарының бірі болып отыр.
Алматыда компанияның екі кеңсесінде мыңға жуық қызметкер жұмыс істейді, тағы бір кеңсесі Астанада орналасқан.
2026 жылғы мәлімет бойынша, компания 2025 жылы 601,6 миллион доллар кіріс көрсетіп, жылдық түсімін 31 пайызға арттырған. Компания үшін негізгі өсім нарықтарының бірі Латын Америкасы болғанымен, Қазақстан маңызды операциялық хаб ретінде қала береді.
