Мемлекет басшысы аталған медициналық мекеменің қасбетіне орнатылған әкесі, майдангер Кемел Тоқаевтың ескерткіш тақтасына гүл шоғын қойып, Екінші дүниежүзілік соғыс майданында ерлікпен қаза тапқан барша боздақтардың рухына тағзым етті.
Бұл ғимараттың соғыс жылдарындағы тарихы өте терең әрі маңызды. 1941 жылдың шілдесінен бастап бұл госпиталь майдан даласында ауыр жараланған 150 мыңға жуық сарбаз бен офицерге ем-дом көрсетіп, олардың аяққа тұрып кетуіне зор үлес қосқан. Сол жауынгерлердің қатарында Мемлекет басшысының әкесі Кемел Тоқаев та болған еді. Ол майданда алған ауыр жарақатынан кейін 1945 жылдың ақпан айынан бастап маусым айына дейін осы емдеу мекемесінде ұзақ уақыт бойы емдеу курсынан өткен.
Ескерткіш тақтаға гүл қою рәсімі аяқталған соң, Мемлекет басшысы Қасым-Жомарт Тоқаев осы тарихи емдеу мекемесінің ішіне кіріп, госпитальдың құрылу шежіресімен, соғыс жылдарындағы жанқиярлық еңбегімен және қазіргі таңдағы тыныс-тіршілігімен жақын танысты. Сонымен қатар Президент майдангерлерге медициналық көмек көрсетудегі госпитальдың тарихи рөлін ерекше атап өтті.
