Есепті кезеңде Қоғамдық кеңес мемлекеттік саясаттың бірқатар маңызды бағыттары бойынша қоғамдық бақылау мен сараптама жүргізіп, мәдениет, ақпарат, жастар және отбасы саясаты, азаматтық қоғамды дамыту және этносаралық қатынастар салаларындағы өзекті мәселелерді қарады.
Үш жыл ішінде 11 отырыс ұйымдастырылды. Кеңес жұмысы алты бейінді бағыт бойынша жүргізіліп, азаматтардың құқықтары, бостандықтары мен міндеттеріне қатысты 550-ден астам нормативтік құқықтық актінің жобасы қаралды.
Нәтижесінде тиісті ұсынымдар әзірленді. Атап айтқанда, 2023 жылы – 88, 2024 жылы – 158, 2025 жылы – 150, ал 2026 жылы – 160 ұсыным берілген.
Ақтөбе мен Таразда көшпелі отырыстар өтті
Қоғамдық кеңес қызметінде өңірлердегі мәселелерге де ерекше назар аударылды. Есепті кезеңде екі көшпелі отырыс ұйымдастырылды.
Ақтөбеде өткен отырыста Қазақстан Республикасында азаматтық қоғамды дамыту тұжырымдамасын іске асыру, креативті индустрияларды дамыту, Отбасын қолдау орталықтарының қызметі және жастарды жұмыспен қамту мәселелері қаралды.
Ал Тараз қаласындағы көшпелі отырыста Халықаралық волонтерлер жылы аясындағы іс-шаралар, «Ұлттық цифрлық мұра» жобасын іске асыру, сондай-ақ музей қорын қалыптастыру және толықтыру мәселелеріне басымдық берілді.
БАҚ, жастар және мәдениет саласындағы мәселелер назарда болды
Қоғамдық кеңес ақпарат саласында халықтың медиасауаттылығын арттыру, мемлекеттік ақпараттық тапсырыстың тиімділігін күшейту, бұқаралық ақпарат құралдарына гранттар енгізу және газеттерді субсидиялау мәселелерін қарады.
Сонымен қатар Қазақстан халқы Ассамблеясының 30 жылдығына арналған іс-шаралар, мәдениет саласындағы әлеуметтік маңызы бар бастамалар мен киноиндустрияны реформалау мәселелері талқыланды.
Кеңес Мемлекеттік жастар саясатының 2023–2029 жылдарға арналған тұжырымдамасы, Қазақстан Республикасындағы 2030 жылға дейінгі отбасылық және гендерлік саясат тұжырымдамасы және мәдениет саясаты саласындағы бірқатар құжаттарды қарауға қатысты.
Биыл Кеңес мүшелері музыкалық шығармаларды орындау кезінде фонограмманың пайдаланылғаны туралы көрерменді хабардар ету қағидаларын, фильмге прокат куәлігін беру қағидаларын, мәдениет және өнер саласындағы мамандандырылған орта музыкалық білім беру ұйымдарына оқуға қабылдау қағидаларын және өзге де құжаттарды талқылады.
«Үкіметтік емес ұйымдар туралы» заң жобасы талқыланды
Қазіргі құрамның жұмысын қорытындылаған отырыстың күн тәртібіндегі маңызды мәселелердің бірі – «Үкіметтік емес ұйымдар туралы» заң жобасы болды.
Қоғамдық кеңес мүшелері заң жобасындағы ұғымдық аппаратты нақтылау, ҮЕҰ қызметкерлерінің еңбек және әлеуметтік кепілдіктерін реттеу, мемлекеттік қолдау тетіктерін жетілдіру және үдерістерді цифрландыру мәселелерін талқылады.
Кеңес мүшелері құжатқа қатысты бірқатар ұсыныстарын білдірді. Олар заң жобасын одан әрі пысықтау барысында қарастырылмақ.
Қазіргі таңда Мәдениет және ақпарат саласындағы Қоғамдық кеңестің құрамында 21 мүше бар.
Алдағы уақытта Қоғамдық кеңестің жаңа құрамы сайланады.
