Бұл мәдени іс-шара жай ғана концерттік бағдарлама шеңберінен шығып, халқымыздың батырлық шежіресін жаңғыртқан, ұрпақтар арасындағы алтын көпірге айналған мәні терең рухани оқиға ретінде есте қалды. Сахна төрінде әскери және эстрадалық-симфониялық оркестрлердің күмбірлеген үні, фольклорлық ансамбльдердің ұлттық нақыштағы әуендері мен мың бұралған бишілердің өнері тоғысып, көрерменді қазақ даласының ерлікке толы өткенінен жарқын болашағына қарай жетеледі. Кештің өзегі ретінде алынған «Жеті ата» тұжырымдамасы бүгінгі айбынды армиямыздың тамыры тым тереңде екенін, оның қайнар көзі Абылай мен Жәңгір хандардың кемеңгерлігінде, Қабанбай, Бөгенбай мен Сартай сынды хас батырлардың білегінің күшінде жатқанын шебер бейнеледі.
Өнер кеші барысында тарихтың әрбір белесі музыка тілінде сөйледі. Ұлы Отан соғысының отты жылдарындағы қазақ ұлдарының қайсарлығы мен тактикалық данышпандығы аңызға айналған қолбасшы Бауыржан Момышұлының тұлғасы арқылы ашылса, тәуелсіз Қазақстанның әскери іргетасын қалаған армия генералы Сағадат Нұрмағамбетовтің аманаты асқақ әуенмен ұлықталды. Эстрадалық-симфониялық оркестрдің сүйемелдеуімен орындалған «Елім-ай» және «Самалтау» сияқты зары мен мұңы, рухы мен күші қатар өрілген туындылар залды тебіреніске бөлесе, Нұртуған жыраудың сөзіне жазылған «Өсиет» толғауы ата-баба аманатын құлаққа құйғандай болды. Бишілер тобы ұсынған «Сағым» және «Сарбаздар» қойылымдары жауынгерлік ширақтық пен әсемдікті үйлестіріп, көрерменнің ыстық ықыласына бөленді.
Вокалдық топтар мен солистердің репертуары да мазмұнының байлығымен ерекшеленді. «Әлия» әнінің нәзік те мұңды сазы мен «Журавли» шығармасының терең философиясы соғыс құрбандарына деген тағзымды бейнелесе, Н. Нұртазиннің «Попурри» композициясы көк аспанды бағындырған ұшқыштардың, толқынмен алысқан теңізшілер мен темір құрсанған танкистердің күнделікті қаһармандыққа толы қызметін шебер суреттеп берді. Кеш соңында шырқалған «Ел қорғаны», «Батырлар», «Атамекенім» және «Егемен Қазақстан» сияқты шабытты жырлар залдағы әрбір азаматтың бойындағы отансүйгіштік сезімін оятып, ертеңгі күнге деген нық сенім ұялатты. Шығармашылық ұжымның кәсіби шеберлігі мен концерттің терең мағыналы мазмұны әскери мамандыққа деген құрметті арттырып, Қазақстан армиясының рухы әрқашан биік екенін тағы бір мәрте дәлелдеді.
