Консультативтік-кеңесші орган халық алдында есеп берді
2017 жылдың 24 шілдесі күні Жамбыл ауданында Жамбыл облысы Ішкі істер департаменті жанындағы Консультативтік-кеңесші орган мен аудандық ішкі істер бөлімі басшы құрамының отырысы болып өтті
Дәстүрлі түрде ұйымдастырылатын отырыстың негізгі мақсаты –ішкі істер органы қызметіне халық сенімін арттыру, полиция мен тұрғындар қарым-қатынасын нығайту, консультативтік, әдістемелік және өзге де әлеуметік мәселелерді шешуде орган тарапынан қажетті көмек көрсету. Сондай-ақ бұқаралық ақпарат құралдары арқылы ішкі істер органы қызметінің өзекті мәселері туралы қалың көпшілікті жан-жақты ақпараттандыру.
Аталмыш жиынға Жамбыл ауданының тұрғындары, Консультативтік-кеңесші орган мүшелері, облыс ІІД құрылымдық бөлімшелерінің басшылары мен БАҚ өкілдері қатысты.
Отырыс барысында Жамбыл ауданы ішкі істер бөлімі жергілікті полиция қызметінің бастығы полиция майоры Д. Нұралиев баяндама жасап, қылмыстылықпен күрес және құқықбұзушылықтың алдын алу жұмыстарын күшейту, қоғамдық қауіпсіздікті және қызмет көрсетілетін әкімшілік аумақта құқықтық тәртіпті қамтамасыз ету бойынша ағымдағы жылдың 6 айында атқарылған жұмыстар жөнінде кеңестік орган алдында есеп берді.
Сонымен қатар Жамбыл АІІБ жеке құрамы арасында тәртіп пен заңдылықтың сақталу жай-күйі туралы мәселелер, Мемлекеттік қызметшілердің Әдеп кодексі нормаларын бұзу деректері қаралды.
Сондай-ақ, шара барысында Жамбыл облысы ІІД ККО мүшелеріне куәліктер табыс етілді.
ККО құрамында қазіргі таңда Жамбыл облысы ІІД басшы құрамы: полиция подполковнигі Н. Қиымбеков, полиция подполковнигі С. Сексенбаев, отставкадағы полиция полковнигі С.Михайленко, сондай-ақ Ұлттық гвардия және ІІО ардагерлер кеңесінің төрағасы Ө. Смайылов бар екендігін атап өту керек.
Қорыта келгенде, Жамбыл облысы Ішкі істер департаменті жанындағы Консультативтік-кеңесші орган Жамбыл АІІБ тарапынан қылмыстылықпен күрес және құқықбұзушылықтың алдын алу бойынша қабылданған шараларды қанағаттанарлық деп таныды.
Алдағы уақытта да Департаменттің ұйымдастырумен ішкі істер органы қызметіндегі өзекті мәселелер туралы консультативтік-кеңестік органының өзге де аудандардағы отырыстары жоспарлануда, сондай-ақ аумақтардағы полиция қызметкерлерінің ҚР Мемлекеттік қызметшілерінің Әдеп кодексі нормаларын бұзу бойынша әрбір дерек жіті назарға алынып, қаралатын болады.
Жамбыл облысы ІІД Баспасөз қызметі
