Бейсенбі, 1 қазан күні, сағат 9:53-те ТЖД Тараз қаласындағы тұрғын үйде өрт шыққаны туралы хабар түсті. Оқиға орнына құрамында 8 адам мен 2 бірлік техникасы бар бригада жетті. Қызыл жалын 10:17-де ауыздықталды. Өрт 4 шаршы метр аумаққа тарады. Оқиға орнында улы газдан улану белгілері бар 2018 және 2017 жылы туған екі баланың денелері мен бірнеше сіріңке қорабы табылды. Өрттің шығу себептері анықталуда.
Алдын ала мәліметтер бойынша, үйдің отағасы жұмыста болған, ал жұбайы балаларды үйде тастап, құлыптап, медициналық мекемеге тексерілуге шығып кеткен. Оқиғаның анық-қанығы әлі де анықталуда.
Оқиға орнына облыс әкімінің орынбасары Ержан Жылқыбаев пен қала әкімі Айтқазы Қарабалаев келіп, облыс әкімдігі атынан көңіл айтты. Жапа шеккен отбасыға жан-жақты көмек көрсетілуде. Оның ішінде психолог маманның кеңесі, көз жұмған балаларды жерлеуге көмек беру бойынша шаралар ұйымдастырылып жатыр.
Жамбыл облысының әкімдігі мен облыстық ТЖД ата-аналарды балаларын қараусыз қалдырмауға шақырады. Азаматтар сақ болып, өрт қауіпсіздігі ережелерін сақтауы керек
