Қазақстан Республикасы Президенті Әкімшілігі басшысының бірінші орынбасары Ерлан Қарин Конституциялық Соттың бүгінгі түсіндірмесіне қатысты пікір білдірді.
Оның айтуынша, Конституциялық Соттың қабылдаған шешімі таза нормативтік-құқықтық сипатқа ие және жаңа Конституцияның күшіне енуіне байланысты туындаған рәсімдік мәселелерге құқықтық түсініктеме береді.
Ерлан Қариннің мәліметінше, 1 шілдеден бастап жаңа Конституциядағы бір реттік өкілеттік мерзімі туралы талап қолданылатын бірқатар мемлекеттік лауазымдарға тағайындаулар жүзеге асырылуы тиіс. Олар:
- Жоғарғы Соттың Төрағасы;
- Бас Прокурор;
- Конституциялық Соттың Төрағасы;
- Конституциялық Соттың судьялары.
Осыған байланысты «бір реттік өкілеттік мерзімі туралы талап қазіргі қызметтегі лауазымды тұлғаларға қолданыла ма, әлде оларды қайта тағайындауға бола ма?» деген құқықтық мәселе туындаған.
Конституциялық Сот бұл мәселеге нақты түсініктеме беріп, бір реттік өкілеттік мерзімі туралы норма жаңа Конституция күшіне енгеннен кейін тағайындалатын тұлғаларға ғана қолданылатынын атап өтті.
Сонымен қатар Ерлан Қарин құқықтық реттеудің бірізділік қағидатына сәйкес, бұл норма Қазақстан Президентіне де қатысты екенін айтты.
Сонымен бірге ол Мемлекет басшысының жеті жылдық бір ғана мерзімге сайлануы туралы конституциялық қағида өзгермейтінін ерекше атап өтті.
«Президенттің жеті жылдық бір ғана мерзімге сайлануы туралы ереже мемлекеттің егемендігі, тәуелсіздігі, унитарлығы, аумақтық тұтастығы және басқару нысаны сияқты өзгертілмейтін конституциялық қағидалардың қатарына жатады», – деді Ерлан Қарин.
Оның сөзінше, Конституциялық Соттың түсіндірмесі қандай да бір тұлғаның автоматты түрде қайта тағайындалатынын немесе сайланатынын білдірмейді. Ол тек Конституция аясында тиісті лауазымға қайта тағайындалу немесе сайлану мүмкіндігінің құқықтық негізін айқындайды.
Осы құқықтық түсіндірменің негізінде бүгін Мемлекет басшысы Қазақстан Республикасының Бас Прокурорын тағайындады.
Ерлан Қариннің айтуынша, бұл шешім еліміздегі жаңа мемлекеттік-саяси модельді қалыптастыру бағытындағы реформалардың жалғасы болып табылады.
Қазіргі уақытта жаңа саяси институттарды іске қосу бойынша жұмыстар жалғасуда. Атап айтқанда, Құрылтай сайлауы тағайындалды, саяси партиялар өз съездерін өткізуде, сондай-ақ «Қазақстан Халық Кеңесі» хатшылығын құру туралы Президент Жарлығына қол қойылды.
