Еліміздің 12 ХҚКО бөлімінде дайын құжаттарға арналған постомат орнатылды

Қазақстанның тоғыз облысындағы ХҚКО-да дайын құжаттарды беру постоматтары орнатылды, олар 24/7 режимінде жұмыс істейді.

Бұған дейін бұл пилоттық жоба Астана мен Алматыда енгізілген болатын. Қызмет алушылар постомат арқылы 2 мыңнан астам құжат алды. Енді Мемлекеттік корпорацияның инновациялық жобасы Шымкент, Тараз, Қордай, Қарағанды, Қызылорда, Павлодар, Түркістан және Семей қалаларында орнатылды.

Айта кетейік, сервис сұранысқа ие қызметтің 11 түрі бойынша қолжетімді. Олардың ішінде баланың тууын тіркеу, жылжымалы мүлік кепілін тіркеу, құжаттарға апостиль қою, құқық белгілейтін құжаттардың телнұсқалары және басқалары бар.

«Аталған қызметтер бойынша өтінімді рәсімдеу кезінде клиентке нәтижені постоматтан алу туралы ұсыныс айтылады. Клиент құжаттың дайын болғандығы туралы хабарламаны алғаннан кейін, 3 күннің ішінде құжатты алуы тиіс. Ұяшық биометриялық сәйкестендіруден өтіп, SMS-хабарламадағы 5 таңбалы кодты енгізгеннен кейін ашылады. Бұл үшінші тұлғалардың сервисті пайдалана алмауы үшін қауіпсіздік мақсатында жасалды», — деп атап өтті Мемлекеттік корпорацияның Басқарма Төрағасы Арман Кенжеғалиев.

Естеріңізге сала кетейік, дайын құжаттардың нәтижелерін алу үшін қызмет алушыларға ХҚКО-ға жүгінудің қажеті жоқ. Келген SMS-хабарламаға келісім беріп, дайын құжаттарды үйге жеткізуге тапсырыс бере алады.

Постоматтар орнатылған ХҚКО-лардын мекенжайларының тізімі:

№	*Қала*	*ХҚКО мекенжайлары*
1	Астана	Керей, Жанибек хандар көш., 4
2	Астана	Республики даңғылы, 43
3	Алматы, Медеу ауданы	Марков көш., 44
4	Алматы, Әуезов ауданы	Жандосов көш., 51
5	Алматы, Алатау ауданы	Нуркент ш/а, 5/17
6	Шымкент, Әл-Фараби ауданы	Жангелдин көш., 13А
7	Шымкент, Қаратау ауданы	Төлеметов көш., 35
8	Тараз қаласы	Төле би даңғылы, 89Г
9	Қордай қаласы	Батыс тұрғын алабы, 25
10	Қарағанды қаласы	Кеншілер даңғылы, 5/2
11	Қызылорда қаласы	Астана даңғылы, 46
12	Павлодар қаласы	Павлов көш., 48
13	Туркістан қаласы	160 орам, 236 құрылыс
14	Семей қаласы	Папанин көш., 34А