Елдегі эпидемиологиялық ахуал маңызы бар салалардың, атап айтқанда, білім және ғылым саласына, әлеуметтік және экономикалық ахуалға, сауда-саттыққа, ауылшаруашылығына, аталған салалардың дамуына кедергі келтіргені рас. Десек те ел тарапынан жүйелі жұмыстар жүргізіліп, жоспарлы әрекеттер кезеңімен орындалуда. Мәселен, 2021 жылдың қаңтар-маусым айларының қорытындысы бойынша Шу ауданының әлеуметтік –экономикалық даму көрсеткіштеріне назар аударса, әр сала бойынша өсім байқалады. 2021 жылдың қаңтар-маусым айларының қорытындысымен Шу ауданының әлеуметтік-экономикалық көрсеткіштерінде оң динамика қалыптасқан. Негізгі капиталға тартылған инвестиция көлемі 101,7%-ке, өнеркәсіп саласында өндірілген өнім көлемі 101,0%-ке, ауыл шаруашылығы саласының өнімі 103,0%-ке, құрылыс жұмыстары 103,7%-ке, пайдалануға берілген тұрғын үй көлемі 110,6%-ке, қаржы игеру көрсеткіші 99,9%-ке орындалған. Қаңтар-маусым айларының қорытындысымен ауданда 36,0 млрд. теңгенің өнімі өндірілген.
Биылғы жылға ауданда барлық мемлекеттік бағдарламалар шеңберінде 5,7 млрд теңге қаражат бөлініп, 57 жоба іске асырылу үстінде. Жобаларды іске асыру арқылы 1,5 мың жұмыс орны ашылады деп жоспарланған. Аудан экономикасының негізгі қозғаушы саласы ауыл шаруашылығы екені белгілі. Биылғы жылдың өнімі үшін 126 931 гектар алқапқа ауыл шаруашылығы дақылдары отырғызылып, 10 084 гектарға сүр айдалды. Жер пайдалану көрсеткіші 100%-ке орындалып, 46 219 гектарға дәнді және дәнді бұршақты дақылдар, 9 050 гектарға майлы дақылдар, 905 гектарға қант қызылшасы және 1 500 гектарға картоп орналастырылды. 16 662 гектар көкөніс пен 10 000 гектар бақша дақылдары егілген. 7 560 гектар алқапқа су үнемдеу технологиялары енгізіліп, өткен жылмен салыстырғанда су үнемдеу технологиялары енгізілген алқаптар 2060 гектарға ұлғайған. Бұл ретте ауданда су үнемдеу технологияларын тиімді пайдаланып, «Қызылша» ЖШС-і егін шаруашылығын дамытуда ауқымды жұмыстар атқарған. Бүгінгі күні азық-түлік бағасының тұрақтылығын сақтау күн тәртібіндегі басты мәселелердің бірі екені белгілі. Осы бағытта Бірлік ауылынан сыйымдылығы 20,0 мың тоннаны құрайтын заманауи технологиямен жабдықталған көкөніс сақтау қоймасының құрылысы жүргізілуде. Нысанның құны 1,2 млрд. теңгені құрайды. Қойма қолданысқа берілгеннен кейін маусымаралық кезеңде баға тұрақтылығын қамтамасыз етуге өз септігін тигізетін болады.
Мал шаруашылығы саласында барлық түліктер санатында және барлық өнім түрлерінде өсім қалыптасты. 6 айдың қорытындысымен 18 385,0 тонна сүт, 4 324,7 тонна ет өндірілген. Шағын және орта кәсіпкерлікті дамытуға мемлекет тарапынан бөлінетін қаржы көлемі жыл сайын артып келеді. Қаңтар-маусым айларында ауданның кәсіпкерлік саласын дамытуға мемлекет тарапынан жалпы 970,6 млн. теңге қаржы берілген. Оның ішінде «Еңбек» бағдарламасы аясында 65 адам 246,2 млн теңге шағын несие алды, 607 азаматқа 350,0 млн теңгеге өз кәсібін бастауға қайтарымсыз грант берілген. «Бизнестің жол картасы 2025» бағдарламасы аясында 39 жеке кәсіпкер 327,9 млн. теңгеге «Қарапайым заттар экономикасы» бағдарламасымен 3 кәсіпкер 46,5 млн. теңге несие алған. Аудандағы жұмыс істейтін кәсіпкерлер саны 7102-ні құрап, өткен жылдың тиісті кезеңімен салыстырғанда 4,9%-ке өскен.
Материал Жамбыл облысы әкімдігінің ішкі саясат басқармасының тапсырысы бойынша дайындалды
