Алматыда әйгілі актер Джеки Чанның қатысуымен түсірілетін Armour of God: Ultimatum («Доспехи бога: Ультиматум») халықаралық көркем фильмінің өндірісі ресми түрде басталды.
Салтанатты рәсімге ҚР Премьер-Министрінің орынбасары – Мәдениет және ақпарат министрі Аида Балаева, Алматы қаласының әкімі Дархан Сатыбалды, Алматы облысының әкімі Марат Сұлтанғазиев, сондай-ақ қазақстандық және халықаралық киноиндустрия өкілдері қатысты.
Аида Балаева Джеки Чанға Қазақстан мен Қытай арасындағы мәдени-гуманитарлық ынтымақтастықты дамытуға қосқан үлесі үшін алғыс айтып, алдағы түсірілім жұмыстарына табыс тіледі.
Іс-шара барысында Джеки Чан Алматының жас суретшілерімен және Т. Жүргенов атындағы Қазақ ұлттық өнер академиясының жас кинематографистерімен кездесіп, шығармашылық жолдағы тәжірибесімен бөлісті. Кездесу соңында балалар актерге өздері салған портреттерін сыйға тартты.
Жоба ҚР Мәдениет және ақпарат министрлігі мен Қытайдың China Film Group Corporation қолдауымен жүзеге асырылып жатыр. Фильмді қазақстандық Sәlem Entertainment және гонконгтық Billion Target компаниялары түсіреді.
Түсірілім жұмыстары 2026 жылдың шілде-қазан айларында Алматы қаласында, Алматы және Маңғыстау облыстарында өтеді. Қоюшы режиссері – қазақстандық Роберт Кун.
Жоба Қазақстанның мәдени, туристік және инвестициялық әлеуетін халықаралық деңгейде танытуға, кинотуризмді дамытуға және елдің әлемдік киножобалар үшін тартымды алаң ретіндегі беделін нығайтуға бағытталған.
