Астана қаласының қылмыстық істер жөніндегі мамандандырылған ауданаралық сотында Бишімбаев пен Байжановқа қатысты қылмыстық іс бойынша үкім жарияланды.
Судья Айжан Құлбаева сотталушыларға қатысты үкім кесті: Қуандық Бишімбаев — 24 жылға, Бақытжан Байжанов — 4 жылға бас бостандығынан айырылды.
Қуандық Бишімбаевқа ҚР Қылмыстық кодексінің екі бабы бойынша айып тағылған болатын:
ҚР ҚК 110-бабы, 2-бөлігі (Қинау)
ҚР ҚК 99-бабы, 2-бөлігі, 5-пункті (аса қатыгездiкпен адам өлтіру).
Ал Бақытжан Байжанов қылмыстық кодекстің 432-бабы бойынша кінәлі деп танылып, 4 жылға сотталды.
Қуандық Бишімбаевтың туысы Бақытжан Байжанов сот үкімімен 4 жылға бас бостандығынан айырылды.
Алғашында Бақытжан Байжанов Қылмыстық кодекстің екі бабы бойынша қылмыс жасады деп айыпталған болатын: 432-бап «ауа ауыр қылмысты жасырып қалу» және 434-бап «аса ауыр қылмысты хабарламау».
Кейін айыптаушы тарап Бақытжан Байжановқа қатысты қылмысты хабарламау туралы айыптан бас тартты.
Сотта олардың кәмелет жасына толмаған балаларының болуы ескерілді.
Еске салсақ, бұған дейін жемқорлық үшін сотты болған Ұлттық экономика экс-министрі Қуандық Бишімбаев 2023 жылдың қарашасында әйелін өлтірді деген күдікпен тұтқындалған болатын. Тергеу амалдары бірнеше айға созылды. Сот отырыстары алқабилердің қатысуымен өтті. Сот барысында бірнеше куәгерден жауап алынды. Қылмыстық іс материалдары зерттелді. Зерттеу барысында Салтанат Нүкенова қаза тапқан күні түсірілген сұмдық видеолар жария етілді.
