Кеше аудан әкімдігінің кіші мәжіліс залында аудан әкімдігі ішкі саясат бөлімінің ұйымдастыруымен аудан әкімдігі жанындағы Қазақстан халқы Ассамблеясы қоғамдық келісім кеңесінің отырысы өтті. Оған аудан әкімінің орынбасары Олжас Баққараев, кеңес төрағасы Бақыт Сырлыбаев, кеңес мүшелері, этномәдени бірлестік жетекшілері, ауылдық округ әкімдері (бейнебайланыс арқылы) қатысты.
Басқосуда кеңес хатшысы Әділет Асан, «Барбанг» күрді этномәдени бірлестігінің жетекшісі Сабри Асанов, Ақбұлым ауылдық округінің әкімі Сағынбек Жанысбаев, Қызылқайнар ауылдық округінің әкімі Рахматулла Исаев ұлтаралық қатынастарды нығайту мен тұрақтандыру бағыты бойынша атқарылған жұмыстар туралы кеңінен баяндады.
Олардың сөзіне сүйенсек, ауданда 30-ға жуық түрлі этнос өкілдері тұрады. Ағымдағы жылдың 11 айында әлеуметтік жағынан аз қамтылған отбасыларға, көпбалалы аналарға, мүмкіндігі шектеулі жандарға көмек көрсету, қолдау білдіру мақсатында «Қамқор», «Сыбаға», «Шашу», «Біз біргеміз!», «Асар», «Мың алғыс» қайырымдылық акциялары ұйымдастырылған. Айтулы мерекелерде түрлі акциялар, басқосу-жиындар өткізілген. Ғасыр жасаған 6 әжеге, тұрмысы төмен 25 отбасыға әлеуметтік сыйқалталар үлестірілген. «Бірлік пен келісім» тақырыбында онлайн сабақтар, этносаралық келісім тақырыбында «Біз біргеміз!» телемарафоны, өзге ұлт өкілдері көп шоғырланған Жамбыл ауылдық округінде «Жалпыұлттық келісім мен қазақстандық патриотизмді нығайтудағы этномәдени бірлестіктердің рөлі» тақырыбында кеңейтілген көшпелі отырыс өткізілген.
Жалпы, ауданымызда ұлтаралық татулық пен рухани келісімді сақтау мақсатында жыл басынан бері түрлі форматта 118 іс-шара өткізіліп, 9800-ден астам тұрғын қамтылған. Аудандық газетте 78, әлеуметтік желілерде 300-ге жуық мақала жарияланған.
Баяндамашыларды байыппен тыңдаған Олжас Елебекұлы мен Бақыт Уалиұлы өзге ұлт өкілдеріне қатысты бірқатар өзекті мәселеге баса мән берді. Жастардың әскерге баруы, ерте жүктіліктің алдын алу секілді түйткілді мәселелер жан-жақты талқыланып, жауаптыларға тиісті жұмыстарды жүргізу тапсырылды.
Есепті кезеңде атқарылған жұмыстар кеңес мүшелері тарапынан оң бағаланды.
