Басқарма басшысы Садырқұлов Рауан Нұрғалиұлының төрағалығымен өткен жиынға басқарма басшысының орынбасары Жангожаева Күнімжан Абдилаканқызы, Байзақ ауданының жалпы орта білім беру мекемелерінің, мектепке дейінгі және қосымша білім беру ұйымдарының басшылары қатысты. Білім бөлімінің басшысы Нұрболат Серікұлының баяндамасымен бастау алған кездесуде атқарылған жұмыстар, жетістіктер, міндеттермен қатар саладағы өзекті мәселелер де талқыланды. Жыл ішінде мектепке дейінгі және жалпы орта білім беру саласында маңызды жетістіктерге қол жеткізілген:
• Бюджет: Білім саласына бөлінген қаражат 28 миллиард теңгеден асты, ал 2025 жылы бұл көрсеткіш 29 миллиард теңгеге дейін артпақ.
• Мектепке дейінгі білім: Жыл соңында 4 жаңа жекеменшік балабақша ашылып, қосымша 538 орын ұсынылды.
• ҰБТ жетістіктері: Орташа балл 82,1 болып, 118 түлек 100 балдан жоғары нәтиже көрсетті.
• Инфрақұрылым: Сарыкемер ауылында 600 орындық жайлы мектеп пайдалануға берілді, ал 2025 жылы тағы бір мектеп салынады.
• Қауіпсіздік: Мектептер 100% бейнебақылау жүйелерімен жабдықталып, 32 мектеп аудандық ішкі істер бөлімімен интеграцияланды.
Сондай-ақ, оқушылар мен мұғалімдер республикалық және халықаралық олимпиадаларда жоғары нәтижелер көрсетті.
2025 жылға қойылған міндеттер:
• Мектеп инфрақұрылымын жаңарту;
• Инклюзивті білім беруді дамыту;
• Оқушыларды қосымша біліммен қамтуды арттыру;
• Ата-аналармен ынтымақтастық жобаларын іске асыру.
Білім бөлімі басшысының есебін тыңдаған басқарма басшысы Рауан Нұрғалиұлы тарапынан білім беру сапасын арттыру, заманауи технологияларды оқу үдерісіне енгізу, педагогтердің біліктілігін арттыру, мектепке дейінгі және жалпы орта білім беру ұйымдардың материалдық-техникалық базасын жақсарту мәселелері бойынша бірқатар тапсырма берілді. Әсіресе, шалғай ауылдардағы мектептердің жағдайы, оқушылардың қауіпсіздігін қамтамасыз ету және тәрбие жұмыстары ерекше назарға алынды. Қатысушылар саладағы өзекті мәселелерді талдап қана қоймай, олардың шешу жолдарына қатысты ұсыныстарын ортаға салды. Жиын қорытындысында білім беру сапасын жақсартуға бағытталған нақты іс-шаралар жоспары талқыланып, алдағы жұмыстардың басымдықтары айқындалды.
Жамбыл облысы әкімдігінің Білім басқармасы
