Тараз. Бүгін Халықаралық ескерткіштер мен тарихи орындар күніне орай Қазақстанның барлық өңірлерінде «Мәдени мұраны бірге сақтайық» атты ауқымды республикалық акция ұйымдастырылды. Іс-шара Жамбыл облысындағы «Ақыртас» сарай кешенінде бастау алып, елдің 20 өңірін қамтыды.
Акция Мемлекет басшысының бастамасымен жүзеге асырылып жатқан «Таза Қазақстан» және «Адал азамат» бағдарламалары аясында өтті. Жобаның негізгі мақсаты – тарихи-мәдени мұра нысандарын сақтау, оларды абаттандыру, сондай-ақ қоғамда экологиялық мәдениетті қалыптастыру.
Акция барысында еріктілер тарихи ескерткіштер аумағын тазалау, көгалдандыру және қалпына келтіру жұмыстарына белсенді қатысты. Сонымен қатар жастар арасында ұлттық құндылықтарды дәріптеу, тарихи сананы жаңғырту және табиғатқа жауапкершілікпен қарау бағытында ақпараттық жұмыстар жүргізілді.
Қазақстанның Азаматтық альянсының ұйымдастыруымен іске асырылып, ел көлемінде волонтерлік қозғалыстың дамуына серпін берді. Акцияның маңызды нәтижелерінің бірі – барлық өңірлерде «Madenietti Mura волонтерлері» клубтарының ашылуы. Бұл клубтар тарихи мұраны қорғау және азаматтық белсенділікті арттыру бағытында тұрақты жұмыс жүргізетін болады.
Айта кету керек, «Ақыртас» сарай кешені – ЮНЕСКО-ның Дүниежүзілік мұралар тізіміне енген Қазақстандағы бірегей тарихи нысандардың бірі. Осы жерде бастау алған акция бүкіл ел бойынша мәдени мұраны сақтау ісіне жаңа серпін берді.
«Мәдени мұраны бірге сақтайық» акциясы мемлекеттік органдарды, азаматтық қоғам өкілдерін және жастарды біріктіріп, тарихи мұраны сақтау мен экологияны қорғауды ортақ құндылық ретінде қалыптастыруға ықпал етті.
Жамбыл облысы әкімінің орынбасары Алтай Әлі, Қазақстан Азаматтық Альянсының директоры Нұрас Ералы және «Madeni Mura волонтерлері» клубының үйлестірушісі Салтанат Дильдабекова сөз сөйлеп, жобаның маңыздылығына тоқталды.
Шара аясында:
Қатысушылар үшін кешен аумағына танымдық экскурсия жүргізілді;
Тарихи нысанның айналасын абаттандыру және тазалық жұмыстары атқарылды;
Белсенді жастар мен волонтерлер арасында тәжірибе алмасу алаңы ұйымдастырылды.
Мәдени жәдігерлерді қорғау — ұлттық бірегейлікті сақтаудың кепілі. Шараға атсалысқан барлық азаматтар мен еріктілерге алғыс білдіреміз.
