Баға көтеріле ме?
Сарапшының айтуынша, ҚҚС өсуі жарты жылдық айналымы 40 миллион теңгеден асатын барлық компанияға әсер етеді. Бұған құрылыс саласындағы кәсіпорындар да кіреді. Сондықтан салықтың артуы — шаршы метр құнының өсуіне әкелетін негізгі себептердің бірі.
Тұрғын үй бағасы өсуіне әсер ететін басқа да факторлар бар:
- құрылыс материалдары қымбаттауы,
- доллар бағамы ауытқуы, т.с.с.
«Осының барлығы баға өсуіне түрткі болады. Болжам бойынша биыл баға 12–15 пайызға өседі, ал келесі жылы бұл көрсеткіш одан да жоғары болуы мүмкін. ҚҚС-тың өсуі осы үрдіске «қосылуы» ықтимал», – деді Лев Тетин.
Сарапшының сөзінше, жалға беру нарығында да баға көтеріледі. Алайда бұл үдеріс баяу жүреді, жыл аяғына дейін 5–8 пайыз аралығында өсім күтіледі.
«Ауыл-аймақтан қалаға көшу жалғасып жатыр. Астана жыл сайын 40–50 мың адамға, Алматы 30–40 мың адамға ұлғайса, Шымкент те қарқынды өсіп келеді. Себебі мегаполистерде инфрақұрылым дамыған, жұмыс мүмкіндіктері көп, өмір сүру сапасы жоғары», – дейді сарапшы.
Ипотека қымбаттай ма?
Жаңа Салық кодексі жобасында екінші деңгейлі банктер үшін корпоративтік табыс салығын арттыру ұсынылған. Бұл өз кезегінде ипотека да қымбаттауына әкеп соғады екен. Бұл туралы ұлттық экономика министрі Серік Жұманғарин мәлімдеген болатын.
Мұндай жағдайда тұрғындар не істеуі керек? Сарапшының айтуынша, қазірдің өзінде ипотекалардың 62 пайызы «Отбасы банк» арқылы рәсімделген. Бұл банктің мөлшерлемелері салыстырмалы түрде тұрақты. Ал екінші деңгейлі банктердегі мөлшерлеме 19–21 пайыз шамасында.
«Қымбат ипотека алғандар болашақта «Отбасы банкке» ауысуы мүмкін. Бұл жерде тек белгілі бір жинақ шарттарын орындау қажет», – дейді Тетин.
Оның болжамынша, екінші деңгейлі банктердегі ипотекалар 1–1,5 пайызға өсуі мүмкін.
«Бүгінде банктер үшін ипотека қызық емес. Олар заңды тұлғаларға несие беруден немесе тұтынушылық несиеден көбірек табыс табады. Ипотека ретінде несие беру — тәуекелі көп, табысы аз сала», – дейді сарапшы.
