Сайси ұйымның жиынында партияның негізгі бағыттары бойынша атқарылған ауқымды жұмыстар сараланып, Қазақстан Республикасының жаңартылған Конституциясына сәйкес партия Жарғысына тиісті өзгерістер мен толықтырулар енгізу мәселелері қаралған.
Съезд барысында партия төрағасы Серік Рахметоллаұлы Егізбаев өз өкілеттігін тоқтату туралы шешім қабылдағанын мәлімдеді. Делегаттардың ұсынысымен бұл қызметке осыған дейін төраға орынбасары болып келген Қайрат Қапарұлы Айтуғановтың кандидатурасы ұсынылып, бірауыздан қолдау тапты.
Халық қалаулысы Ерболат Саурықов партияның дамуына өлшеусіз үлес қосып, ортақ мақсат жолында аянбай еңбек еткен Серік Рахметоллаұлына шынайы алғысын білдірді. Оның кәсіби білімі мен мол тәжірибесі алдағы уақытта да ел игілігі жолындағы бастамаларға қызмет ете беретініне сенім білдірді.
«Өздеріңізге белгілі, «Ауыл» партиясы ауылдық аумақтарды дамыту, аграрлық секторды өркендету және еңбек адамының мүддесін қорғау бағытында жүйелі жұмыс жүргізіп келеді. Осы маңызды міндеттерді жүзеге асыру жолында партия тізгінінің Қайрат Қапарұлына тапсырылуы – уақыт талабына сай әрі маңызды шешім деп есептеймін», – деп жазды Мәжіліс депутаты.
Жаңадан сайланған төраға Қайрат Айтуғанов – аграрлық экономика, мемлекеттік басқару және ғылым салаларында қырық жылдан астам еңбек еткен, басқару ісінде үлкен мектептен өткен білікті маман.
Ол әр жылдары жауапты әрі жоғары лауазымды қызметтерді атқарған:
-
Қазақстан Республикасы Ауыл шаруашылығы бірінші вице-министрі;
-
Халықаралық қайта құру және даму банкі жобасының жетекшісі;
-
«Оңтүстік» ӘКК» АҚ басқарма төрағасы;
-
Қарағанды облысы әкімінің орынбасары;
-
«ҚазАгро» ұлттық басқарушы холдингі» АҚ басқарма төрағасының орынбасары;
-
«Ұлттық аграрлық ғылыми-білім берегу орталығы» КЕАҚ директорлар кеңесінің төрағасы;
-
С.Сейфуллин атындағы Қазақ агротехникалық университетінің басқарма төрағасы.
Ерболат Саурықов жаңа басшылықтың бастамаларына жеміс тілеп, қолға алынған игі істердің ел дамуы мен ауыл өркендеуіне жаңа серпін беретініне сенімді екенін жеткізді.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
