Мерекелік іс-шараға Қорғаныс министрлігі мен Бас штаб басшылығы, Ақмола гарнизонының жауынгерлері, қадірлі ардагерлер мен «Жас сарбаз» қозғалысының тәрбиеленушілері қатысты. Жиын барысында Қорғаныс министрі, авиация генерал-лейтенанты Дәурен Қосанов жеке құрамды құттықтап, бұл мерекенің жаңа Конституция аясындағы маңызына ерекше тоқталды. Ол Отан қорғаушы күнін мемлекеттіліктің, егемендік пен халық бірлігінің маңызды символы ретінде атап өтіп, ведомствоның заңнаманы жетілдіру, әскерді цифрландыру және жауынгерлік әзірлікті арттыру бағытындағы ауқымды жұмыстарын тілге тиек етті.
Ел басшылығы әскери сала мамандарының еңбегін жоғары бағалап, Мемлекет басшысының Жарлығымен Айдос Мырзахметовке «генерал-майор», ал Тимур Еспағанбетовке «авиация генерал-майоры» шендерін берді. Сонымен қатар, Ренат Дәрменов, Дмитрий Федорченко және Данияр Хайрушев сынды офицерлер Б. Момышұлы атындағы ІІ дәрежелі «Айбын» орденімен марапатталса, сержанттар Медет Мұхтархан мен Ғалымжан Тәукебаев Р. Қошқарбаев атындағы ІІІ дәрежелі «Айбын» орденіне ие болды. Жалпы алғанда, министрліктің 34 қызметкері мемлекеттік наградалармен, соның ішінде «Құрмет» орденімен, «Жауынгерлік ерлігі үшін» және «Ерен еңбегі үшін» медальдарын иеленді.
Марапаттау рәсімі мұнымен шектелмей, 41 әскери қызметші «Ел қорғаны» медалін, ал 11 мерзімді қызметтегі сарбаз «Қазақстан Республикасы Қарулы Күштерінің үздігі» төсбелгісін алды. Сондай-ақ, 48 қызметкерге мерзімінен бұрын кезекті әскери атақтар табыс етілді. Салтанатты кеш Ұлттық әскери-патриоттық орталықтың шығармашылық ұжымы дайындаған мерекелік концертпен қорытындыланды.
