Қазақстан Республикасы Мәдениет және ақпарат министрі Аида Балаеваның бұйрығымен Александр Селезнёв атындағы Алматы хореографиялық училищесінің директоры қызметіне Ая Жәкенқызы Қалиева тағайындалды. Ая Қалиева — Қазақстан Республикасының еңбек сіңірген қайраткері, ҚР білім беру ісінің құрметті қызметкері, педагогика ғылымдарының кандидаты, іскерлік әкімшілік магистрі (MBA), профессор, бірнеше ғылыми еңбектер мен оқу құралдарының авторы. 1990 жылы П. И. Чайковский атындағы музыкалық училищесінде, 1995 жылы Құрманғазы атындағы Қазақ ұлттық консерваториясында «композиция» мамандығы бойынша білім алған. Еңбек жолын музыкалық колледжде оқытушылық қызметтен бастаған. Кейін Құрманғазы атындағы Қазақ ұлттық консерваториясы мен Т. Жүргенов атындағы Қазақ ұлттық өнер академиясында кафедра меңгерушісі, декан болды. 2008 жылы педагогика ғылымдарының кандидаты ғылыми дәрежесін, 2015 жылы Almaty Management University-де іскерлік әкімшілік магистрі (MBA) дәрежесін алған. Кейінгі жылдары елдегі жетекші мәдениет және білім беру мекемелерінде басшылық қызметтер атқарған: – 2010–2015 жылдары — П. И. Чайковский атындағы Алматы музыкалық колледжінің директоры; – 2015–2018 жылдары — А. Селезнёв атындағы Алматы хореографиялық училищесінің директоры; – 2018 жылы — Жамбыл атындағы Қазақ мемлекеттік филармониясының директоры; – 2018–2021 жылдары — Абай атындағы Қазақ ұлттық опера және балет театрының директоры.
ҚР Мәдениет және ақпарат министрлігінің баспасөз қызметі
