Бүгін Қазақстан Республикасы Президенті жанындағы Орталық коммуникациялар қызметі алаңында Алматы қаласының әкімі Дархан Сатыбалды мегаполистің 2025 жылдың 11 айындағы әлеуметтік-экономикалық даму нәтижелері туралы баяндап, сондай-ақ 2030 жылға дейінгі қаланы дамытудың негізгі басымдықтары мен жоспарларын таныстырды.
Әлеуметтік салада 2025 жылы 37,1 мың оқушыға арналған 22 білім беру нысаны салынды. Бұл мектептердегі орын тапшылығын едәуір азайтуға мүмкіндік берді. Сонымен қатар, алдағы кезеңде 16 балабақшаны пайдалануға беру және жекеменшік мектепке дейінгі ұйымдарда 10 мың қосымша орынға мемлекеттік тапсырыс орналастыру жоспарлануда.
Алматы қаласында жастарға арналған арендалық тұрғын үй бағдарламасы 2019 жылы іске қосылған болатын. Бағдарлама аясында пәтерлер 5 жыл мерзімге берілді. 2024 жылы алғашқы қатысушылардың жалдау мерзімі аяқталды.
Қазіргі таңда 1 мыңнан астам пәтерді қайтару жоспарланған, оның 900-ге жуығы жастардың өз еркімен қайтарылды. Бұл азаматтардың бір бөлігі өзге тұрғын үй бағдарламалары арқылы баспанаға қол жеткізген.
Сонымен қатар шамамен 150-ге жуық пәтер әлі босатылмаған. Аталған мәселе бойынша сот органдарына жүгінгенбіз, сот шешімдері қала әкімдігінің пайдасына шықты. Алдағы уақытта бұл пәтерлер толық босатылады деп күтілуде.
Жалпы, жастарға шамамен 4 500 арендалық пәтер берілген. Тексеру барысында кейбір азаматтардың пәтерлерді үшінші тұлғаларға жалға бергені анықталды. Мұндай жағдайларда шарт талаптары біржақты тәртіппен бұзылып, пәтерлер қайтарылып алынып, басқа мұқтаж азаматтарға беріледі.
Босатылған пәтерлер қажет болған жағдайда жөндеу жұмыстарынан өткізіліп, келесі жылы өзге тұрғын үй бағдарламалары аясында қайта пайдалануға берілмек.
Қалада реновация жобалары кварталдық тәсілмен жүзеге асырылуда. Егер реновация аумағында мектеп мәселесі шешілмесе, құрылыс жүргізуге рұқсат берілмейді. Сонымен қатар, жеке құрылыс салушылардың әлеуметтік жауапкершілігі аясында қазіргі таңда Алматы қаласында шамамен 13 құрылыс компаниясы мектептерді өз қаражаты есебінен салып беруде.
2025 жылы қалада 20 мектеп пайдалануға беріледі. Бұдан бөлек, қала бюджеті есебінен қосымша 2 мектептің құрылысы жүріп жатыр. Қолданыстағы мектептерді кеңейту мақсатында қосымша ғимараттар салынуда.
2026–2030 жылдарға дейінгі жоспарға сәйкес, Алматы қаласында қажеттілікке байланысты 69 мектеп салу көзделген. Оның ішінде аса қажетті 17 мектеп бойынша нақты жоспарлар әзірленген.
Сонымен қатар, негізгі мәселелердің бірі – жер телімдерінің басым бөлігінің жекеменшікке өтіп кетуі. Осыған байланысты қала әкімдігі жер телімдерін анықтау немесе құрылыс салушыларға мектеп салуды ұсынып, кейіннен бұл нысандарды сатып алу тетіктерін қарастыруда.
