Облыс әкімі Б.Сапарбаевтың «Асарлатып үй салу» жобасы аясында біркісідей жұмылып, көңілге қуаныш ұялатуды көздеген айшабибіліктердің жомарттығы мен мейірімділігіне қайран қаласың.
Қазына қариялардың үйме-үй аралап, кәсіпкерлерге қолқа салып, мұқтаж отбасына асарлатып көмек көрсетейік деген аталы сөзі әлі күнге дейін есімізде.
Игілікті іске шаруа қожалықтары бар тұрғындар мен қолы ашық азаматтар қолғабыс етіп, небәрі 3 айдың ішінде 13 соттық жерге зәулім баспана тұрғызып үлгереді деп ешкім ойламаған еді.
Ал бүгінгі көрініс тұрғындардың ауызбіршілігін көрсетіп тұрғандай.
Бір қызығы қайырлы амалға аудан әкімі аппаратының басшысы Жомарт Телеуов пен ауданның құрама командасының ойыншылары әр демалыс күндері істің басынан табылып, сауапты іске ден қойса, ауыл әкімі Раимбек Сеитовте таразыда салмағы ауыр амалдан шет қалмаған. Арнайы техникамен қамтамасыз етіп, қараша халықтың арасында жүр.
Оның айтуынша, ішкі жиһаздарын үйлестіріп берем деген кәсіпкер сөзінде тұрып, бүгінде қажетті жабдықтарды үйдің ішіне орналастырып үлгеріпті.
Енді үйдің маңайына асфальт төсеу жұмыстары қалып отыр екен.
Тағы бір айта кететін жағдай, көпбалалы отбасының отағасы да баспананың еңсе тіктеуіне зор үлесін қосып жүр. Ол игілікті іске атсалысқан барша ағайынға шексіз риза. Қасына бара қалсаңыз мейірімді жандарға Алла тағала сансыз сауаптан жазсын деп отырғаны.
Көп ұзамай салтанатты жағдайда баспана кілті табыс етілсе, қоналқадан бала-шағаның күлкісі естілгенге не жетсін!
