Қаламыздың Бауыржан Момышұлы атындағы “Жеңіс” саябағында “Дүниежүзілік қоршаған ортаны қорғау күніне арналған іс-шараларды жүргізу” əлеуметтік маңызды жобасы аясында “Таза Табиғат! Жасыл əлем!” атты акциясы өтті. Жамбыл облысы əкімдігі табиғи ресурстар жəне табиғатты пайдалануды реттеу басқармасының тапсырмасымен “Жамбыл облысы жастар ұйымының Қауымдастығы” заңды тұлғалар бірлестігі ұйымдастырған мазмұнды шараға қала тұрғындары мен жас жеткіншектер қатысты. Шараға арнайы шақырылған Жамбыл облыстық “Жас Отан” жастар қанатының төрағасы Уалихан Болатбек: “Тараздың тазалығы көңіл қуантады. Күнделікті өмірде өзіміз байқамасақ та, сырттан келген қонақтар қала тазалығына мəн беріп, баға беріп жатқанда іштей қуанып қаламыз.
Алайда қаланың мөлтек аудандарында қоқыс жəшіктеріне қатысты біраз мəселе бар. Тұрғындар қоқысты қараңғыда қоқыс жəшігіне тастамай, жолға тастап кетіп жатады. Бұл көңіл қынжылтады. Тазалықты ең бірінші өзімізден бастауымыз керек. Балаларымызды соған дағдыландыруымыз керек” – дей отыра осындай акциялардың халыққа берер мол пайдасын атап өтті. Жамбыл облыстық жасыл жасақтары штабының белсендісі Мансұр Шамуратов: “2005 жылы Елбасымыз Нұрсұлтан Əбішұлының бастамасымен “Жасыл ел” еңбек жасақтары құрылды. Осы бағдарламаның арқасында еліміздің көптеген аймақтары өзінің табиғи сұлулығын сақтап келеді. Құрметті Тараз қаласының жастары мен тұрғындары, сіздерді дəл қазіргі сəттен бастап қаламыздың тазалығын сақтауға шақырамын!” – деді өз сөзінде. Əрі қарай қаланың жас ақыны Қаныбек Мұратбаев табиғат тақырыбына арнаған мағыналы өлеңін оқып, тұрғындардың ыстық ықыласына бөленді. Шараға арнайы келіп қонақ болған белгілі жас əнші Əділет Асанов əуезді əн салып зор ықыласқа ие болды. Өткізілген акция аясында мектеп оқушылары арасында “Таза болса табиғат аман болар адамзат” тақырыбында шығарма байқауы, балабақша тəрбиеленушілері арасында “Əлем балалар көзімен” тақырыбында сурет байқауы өткізілді. Қос байқауға Жамбыл облысы əкімдігінің “Табиғи ресурстар жəне табиғатты пайдалануды реттеу” басқармасының бөлім басшысы Нағима Темірбекова, Тараз қалалық білім бөлімінің экология пəндерінің əдіскері Гүлхадиша Əбдірашқызы, «Жамбыл облысы жастар ұйымы Қауымдастығы» заңды тұлғалар бірлестігінің президенті Исламбек Дастанұлы қазылық етті. Шара соңында байқауға қатысушылар мен жеңімпаздар алғыс хаттармен жəне бағалы сыйлықтармен марапатталды. “Қала тұрғындарына тамаша көңіл күй сыйлаған мазмұнды шара алдағы уақытта жиі өткізіліп тұрады” — деді акция ұйымдастырушылары.
АРАЙЛЫ ЖАҚСЫЛЫҚ
