Мемлекет басшысы Түркияны Қазақстан үшін бауырлас әрі сенімді серіктес деп атап, екі ел арасындағы тарихи тамыры терең байланыстар халықтар достығын нығайтып отырғанын айтты.
Президенттің сөзінше, қазіргі таңда қазақ-түрік қарым-қатынасы кеңейтілген стратегиялық серіктестік деңгейінде қарқынды дамып келеді. Сондай-ақ мемлекетаралық, үкіметаралық және парламентаралық байланыстардың жоғары деңгейде екенін жеткізді.
– Түркия – Қазақстан экономикасындағы ірі инвесторлардың бірі. Осы уақытқа дейін Түркиядан елімізге 6 миллиард доллар инвестиция тартылды. Ал Қазақстанның Түркияға салған инвестиция көлемі 2,5 миллиард долларға жуықтады. Сонымен қатар Түркия – біздің негізгі бес сауда серіктесіміздің бірі, – деді Қасым-Жомарт Тоқаев.
Кездесу барысында мәдени-гуманитарлық ынтымақтастықтың да маңызы ерекше аталды. Мемлекет басшысы қос халық арасындағы рухани және мәдени байланыстарды қарым-қатынастың алтын арқауы деп бағалап, бұл бағыттағы жұмысты жалғастыруға мүдделі екенін жеткізді.
Сонымен қатар тараптар «Мәңгілік достық және кеңейтілген стратегиялық серіктестік туралы» декларация қабылдайтынын мәлімдеді. Президенттің айтуынша, бұл құжат қазақ-түрік қатынастарына тың серпін береді.
Қасым-Жомарт Тоқаев Түркияның соңғы жылдары әлеуметтік-экономикалық даму жолында айтарлықтай жетістікке жеткенін де атап өтті.
– Сіздің салиқалы саясатыңыздың нәтижесінде Түркияның халықаралық беделі артып келеді. Түрік елі қуатты экономикасы мен белсенді дипломатиясының арқасында Еуропа мен Азияны, сондай-ақ күллі түркі дүниесін жалғаған алтын көпірге айналды, – деді Қазақстан Президенті.
