Түркия Президентінің борты Қазақстан әуе кеңістігіне енген сәттен бастап, оны Қазақстан Республикасы Әуе қорғанысы күштерінің жойғыш ұшақтары құрметпен қапталдаса бастап ұшты.
Салтанатты қабылдау рәсімінде Құрмет қарауылы ротасы сап түзеп, екі елдің жалауын желбіреткен бүлдіршіндер Режеп Тайип Ердоған бастаған ресми делегацияға «Ata yurda hoş geldiniz!» – «Атажұртқа қош келдіңіз!» деп қос тілде ақжарма тілектерін арнады.
Дәл осы сәтте көкте Түркия мен Қазақстан туларын мақтанышпен желбіреткен тікұшақтар тобы салтанатты шерумен ұшып өтті.
Мәдениет пен бауырластықтың алтын көпіріндей болған бұл кездесу әуежай терминалында жалғасып, жас өнерпаздар түрік елінің көшбасшысына арнап рухты «Домбыра» композициясын орындады.
