Аталған қабылдауға жауапты басқарма басшылары арнайы қатысып, әрбір азаматтың өтініші мен ұсынысы егжей-тегжейлі сараптамадан өткізілді. Бүгінгі таңда халықтың мұң-мұқтажына жедел назар аудару және көтерілген мәселелерді уақтылы шешу бағытындағы жұмыстар облыс көлемінде жүйелі түрде жүргізіліп келеді. Қабылдау барысында жергілікті тұрғындар тарапынан қоғамның түрлі салаларына қатысты өзекті сауалдар қойылды. Соның ішінде, Тараз қаласында қысқы спорт түрлерін, атап айтқанда хоккейді ілгерілету мақсатында заманауи мұз айдынын салуға мемлекет тарапынан қолдау көрсету мәселесі басты назарға алынды. Сондай-ақ, кездесуде соғыс ардагері Керімбай Борис Түкенұлының есімін мәңгілікке қалдыру мақсатында Қордай ауылынан арнайы стелла тұрғызу үшін жер телімін бөлу және Қордай ауданында «Таулы Қарабах ардагерлері мен мүгедектерінің республикалық одағы» филиалын ашу мүмкіндіктерін қарастыру туралы өтініштер айтылды. Бұдан бөлек, Чернобыль атом электр станциясындағы қайғылы апаттың 40 жылдық айтулы датасына орай тиісті іс-шаралар кешенін ұйымдастыру, білім беру жүйесінде жұмысқа орналасуға көмек көрсету, дарынды спортшылардың республикалық деңгейдегі жарыстарға қатысуына жағдай жасау және мәдени шараларды өткізуге қолдау білдіру секілді маңызды сауалдар ортаға салынды. Облыс әкімінің орынбасары әрбір тұрғынның уәжін мұқият тыңдап, бұл мәселелердің барлығы қолданыстағы заңнама аясында қарастырылып, оңтайлы шешімдер қабылданатынын жеткізді. Қабылдау барысында көтерілген барлық арыз-шағымдар мен өтініштер облыс басшылығының тікелей бақылауына алынды.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
