Клубтың мақсаты – жастарды сайлау процесін тәжірибелік зерттеуге тарту, белсенді азаматтық ұстаным мен сайлауға қатысу дағдыларын дамыту болып табылады. Клуб қызметі шеңберінде оқыту семинарларын, іскерлік ойындар, сайлау комиссияларының өкілдерімен кездесулер өткізу, сондай-ақ түрлі акциялармен іс-шараларға қатысуды жоспарлап, оған қатысуды ұйымдастырады.
Ал форумның негізгі мақсаты – сайлауға қатысу белсенділігін арттыру, азаматтың жауапкершілігін нығайту және ел болашағына бейжай қарамай, өз үнін білдіру, шақыру. Форум жастардың сайлау процесі жөніндегі білімін арттыру, олардың құқықтық сауаттылығын күшейту, сайлау мәдениетін қалыптастыру, сондай-ақ жас буынның сайлау науқандарына белсенді әрі саналы түрде қатысуына жағдай жасау бағытында еркін форматтағы ашық пікір алмасуды көздейді.
Форумға аудан әкімі Ермек Амангелдіұлы Карентаев, Жамбыл облыстық сайлау комиссиясының мүшесі Мейіржан Ермекбайұлы Сембеков, Мойынқұм аудандық аумақтық сайлау комиссиясының төрағасы Сержан Қалқаманұлы Сәдуақасов, Жастар ресурстық орталығыныңдиректоры, жас сайлаушылар клубының төрағасы Мәди Жәнібекұлы Күнту, аудан орталығындағы білім ордалары мен мекемелердің, ауыл, ауылдық округтердің әкімдері мен жастар ісі жөніндегі мамандары, бұқаралық ақпарат құралдарының өкілдері қатысты.
Форумды аудан әкімі Ермек Амангелдіұлы Карентаев ашып, форум жұмысына сәттілік тіледі.
Бүгінгі форумның мақсаты − жастардың саяси сауаттылығын арттырып, сайлауға деген қызығушылығын күшейту. Бұл − Мемлекет басшысы қолға алып жатқан саяси жаңғыру реформаларымен тікелей байланысты. Президентіміз ұсынған жаңа өзгерістердің барлығы сайлау жүйесінің ашықтығын, әділдігін, қоғаммен кері байланыстың күшеюін көздейді. Демек, жаңа реформалар – сіздердің дауыстарыңыздың шынайы естілуіне мүмкіндік беретін маңызды қадам. Құрметті жастар! Сайлау − жай ғана бюллетень салу емес.
Бұл − өз таңдауың арқылы елдің болашағына ықпал ету. «Менің дауысым маңызды» деген түсінік тек ұран болмауы керек, ол – әр азаматтың ішкі ұстанымы.
Құрметті форум қатысушылары!
Осындай бастамалардың аясында саяси сауаты жоғары, қоғам өміріне бей-жай қарамайтын, жауапкершілігі мол жаңа буын қалыптасады деп сенемін. Сіздерге бүгінгі кездесуден мол серпін, ерекше ой, жаңа бағыт алуға тілектеспін. Баршаңызға белсенділік тілеймін!,-деді аудан басшысы.
Келесі кезекте Жамбыл облыстық аумақтық сайлау комиссиясының мүшесі Мейірбек Ермекбайұлы Сембеков сөз алып, жас сайлаушылар клубының мақсаты мен міндеттеріне жалпы сайлау деген не, ол қалай өтеді, сайлаушылардың қоғамдағы аса маңызды процесс сайлаудың ерекшелігі, жас сайлаушылардың сайлау барысындағы әрекеттері жайында сөз қозғады. Мұнан кейін сөз алған аудандық аумақтық сайлау комиссиясының төрағасы Сержан Қалқаманұлы Сәдуақасов Жас сайлаушылар клубын құрудағы негізгі мақсат, оның құрамы, атқаратын қызметі жайында айтып өтті. Содан соң сөз тізгінін алған Жастар ресурстық орталығының директоры, жас сайлаушылар клубының төрағасы Мәди Жәнібекұлы Күнту жастардың аудандық мәслихат депутаттары корпусындағы белсенді жұмысы жайында, аймақтың саяси процесіндегі өркендеуі туралы айтып өтті.
Ал «Нұр-бала» шағын орталығының жетекшісі Әсел Мейрамбекқызы Дүйсекеева аудан бойынша психоневрологиялық аурулары тірек-қимыл аппараты бұзылған 4 жастан 18 жасқа дейінгі мүгедектігі бар балаларға мәдени-бұқаралық іс-шаралармен білім беру курстарын ұсыну бойынша өзінің ой-пікірлерімен бөлісті.
Жас сайлаушылар клубының мүшесі Сәкен Теміржанұлы Сағадин Жамбыл атындағы мектеп-гимназиясының «JASSTAR» мектеп парламенті жастар арасындағы жұмыстарды баяндап, жастарды сайлау процесін тәжірибелік зерттеуге тарту, белсенді азаматтық ұстанымын қалыптастыру, сайлауға қатысу дағдылары мен патриоттық сананы дамыту бойынша пікір алмасты. Сонымен қатар баяндамашыларға жиынға қатысушылар тарапынан «Сайлауға 18 жасқа толмаған жастардың қызығушылығы не үшін маңызды?», «Жастар сайлау процесі туралы дұрыс ақпаратты қайдан алады?», «Жас сайлаушылар клубы қандай рөл атқарады?», «Клубқа қалай кіруге болады?» деген сұрақтар қойылып, оған толыққанды жауап берілді.
Форумның мәдени бөлімінде аудандық мәдениет үйі өнерпаздарының орындауында патриоттық әндер шырқалып, сайлау туралы қойылым көрсетілді.
Форумда жас сайлаушы жастардың партия жұмысына қатысуы – олардың азаматтық ұстанымының көрінісі туралы және орта білім беру ұйымдарының ауданымыздағы өзін-өзі басқару мектеп парламенттерінің үздік жастары сөз сөйледі.
Қызылорда қаласында өткен байқауда Үздік презентация номинациясын жеңіп алған Жамбыл мектеп-гимназиясы мектеп парламенті мүшелерінің ән шырқауы жиынға қатысушылардың рухын көтеріп, оларға мерекелік көңіл-күй сыйлады.
Форумда жас сайлаушылар клубының жұмысын ұйымдастыру мен өткізу барысында жоғары белсенділік танытқаны үшін Жамбыл атындағы мектеп-гимназиясының, М.Жұмабаев атындағы мектеп-лицейінің, Т.Рысқұлов атындағы тірек мектебінің мектеп парламенттерін аудандық аумақтық сайлау комиссиясы төрағасының Алғыс хатымен марапаттады. Форумның аяқталу сәтінде аудандық мәдениет үйінің әншісі Қасымжан Сағадинұлы Сәденов патриоттық бағыттағы «Атамекен» әнін шырқап, форумға қатысушыларды ерекше бір сезімге бөледі. Жиынға қатысушылар бұл әнді орындарынан тұрып тыңдады.
Форумның соңында 150-ге жуық қатысушы өздерінің ойлары мен пікірлерін құпия түрде жүргізілген сауалнама арқылы білдірді.
Жолдыбай ДӘМЕТОВ,
«Мойынқұм таңы».
