Президент Қасым-Жомарт Тоқаевтың тапсырмасына сәйкес Ақтөбе облысында резиденция мәселесін шешу бағытында бірқатар жұмыстар атқарылды. Бұған дейін әкімдікке қарасты шамамен 300 м² ғимарат қарастырылғанымен, оны балалар мекемелері тізіміне енгізу мүмкін болмады. Осыған байланысты ЕRJ компаниясымен келісім жасалып, қаланың ортасынан кең әрі қолайлы жаңа ғимаратты сатып алу жұмыстары қолға алынды.
Сонымен қатар, облыста психологтар тапшылығы мәселесі шешіліп, «Жан ахуал» орталығы ашылды. Орталық толық жасақталып, балалар мен жасөспірімдерге қажетті психологиялық қолдау көрсету жұмыстарын бастады.
Ақтөбе облысында шөлдену, жел эрозиясы және топырақ деградациясы тәуекелдері де күн тәртібіндегі маңызды мәселелердің бірі болып отыр деді Асхат Шахаров. Президент тапсырмасына сәйкес пайдаланылмай жатқан ауыл шаруашылығы жерлерін айналымға қайтару және егістік көлемін арттыру бағытында шаралар жүргізілуде. Биыл егістік алқабы 10%-ға өсіп, жалпы көлемі 400 мың гектардан асты. Қараусыз қалған жерлер заң талаптарына сай мемлекет меншігіне қайтарылып, оларды тиімді игере алатын шаруалар мен кәсіпкерлерге беру жұмыстары жалғасуда.
Өңірде экожүйені сақтау мақсатында барлық аудандарда дендрокарталар әзірленіп жатыр. Сондай-ақ көгалдандыру, абаттандыру және «Таза Қазақстан» бағдарламасы аясындағы іс-шаралар жүйелі түрде жүзеге асырылуда.
Топырақ деградациясына қатысты үкіметтік емес ұйымдар да зерттеу жұмыстарын жүргізуде. Алматыдан келген мамандар өңірдің жер ресурстарын талдап, деградацияны тежеу және егістік алқаптарын ұлғайту бойынша ұсыныстар әзірлеп жатыр. Жыл соңына дейін толық сараптамалық қорытынды дайындалуы жоспарланған. Қорытынды негізінде өңірге ресми түрде жазбаша ақпарат беріледі.
