Осы бағытта «Ардагерлер ұйымы» республикалық қоғамдық бірлестігінің Жамбыл облыстық филиалы ауқымды жұмыстар жүргізіп келеді. Ұйымның төрағасы – Солтыбаев Еркінбек Бейсенбекұлы.
Филиалдың негізгі мақсаты – ардагерлердің құқықтарын қорғау, әлеуметтік-тұрмыстық жағдайларын жақсартуға ықпал ету, медициналық, мәдени және басқа да көмек түрлерін ұйымдастыру, сондай-ақ жастарды отансүйгіштікке тәрбиелеу. Қазіргі таңда облыстағы зейнеткерлердің 85 пайызы ардагерлер ұйымдарының жұмысына тартылған. Бұл – ардагерлердің қоғамдық өмірге белсенді араласып отырғанының айғағы. Өңірде облыстық, қалалық, аудандық ардагерлер кеңестері және ауылдық бастауыш ұйымдардан құралған 894 ардагерлер ұйымы жұмыс істейді.
2015 жылы Тараз қаласында Ардагерлер үйі ашылып, пайдалануға берілді. Бұл – ардагерлердің бас қосып, түрлі іс-шаралар өткізуіне, тәжірибе алмасуына және қоғамдық өмірге белсене араласуына мүмкіндік беретін маңызды алаң. Облыстық ардагерлер кеңесінің жанынан «Билер кеңесі» құрылған. Қазіргі таңда өңір бойынша 518 би осы кеңестің құрамында жұмыс істеуде. Олар ел ішіндегі дау-дамайды бейбіт жолмен шешуге, халықты бірлікке шақырып, ата салтты жаңғыртуға өз үлестерін қосып келеді.
Сонымен қатар, ардагерлер кеңесінің жанынан құрылған «Әкелер кеңесі» де белсенді жұмыс атқаруда. Бұл кеңес әкелердің отбасындағы жауапкершілігін арттырып, бала тәрбиесіндегі рөлін айқындауға, отбасылық қарым-қатынасты нығайтуға бағытталған. Жастарға бағытталған бастамалар қатарында «Бабалар аманаты», «Отбасы» мектебі және «Ағаның ақылы» мектептері бар. Бұл жобалар арқылы ұлттық құндылықтарды дәріптеп, жас буынға үлкендердің ақыл-кеңесін жеткізу көзделген.
Жамбыл облыстық ардагерлер ұйымы бүгінде өңірлік деңгейде ғана емес, елдік мүдде тұрғысынан да маңызды қызмет атқарып отыр. Ардагерлердің белсенділігі мен қоғамдық істерге араласуы – ел бірлігі мен ұрпақ сабақтастығын нығайтудың жарқын үлгісі. Ұйым алдағы уақытта да осы бағыттағы жұмысын жалғастыра бермек.
