Байрақты бәсекеде ел намысын қорғап, жеңіс тұғырынан көрінген Нұрдәулет Жұмағали Париж Паралимпиадасының финалында SB13 санатында 100 метрге брасс әдісімен жүзуден бақ сынап, күміс медаль жеңіп алды.
Айта кетейік, Нұрдәулет Токио Паралимпиадасында қола медаль иеленген еді.
Нұрдәулет 2021 жылы Токио жазғы Паралимпиада ойындарында үш қашықтықта жарысқа түсті. 29 тамызда еркін стильдегі 50 метрлік қашықтықта (S13 категориясы) іріктеуде 16 қатысушының ішінде 16-орынды иеленді. 30 тамызда 200 метрге кешенді жүзуде (SM13 категориясы) 14-орынға ие болды. Ал 1 қыркүйекте 100 метрге брасс әдісімен (SB13 категориясы) іріктеу кезеңінде екінші орынды алып, жалпы есепте үшінші орынмен финалға өтті. Финалда Паралимпиада-2020-ның қола жүлдегері атанды.
Спортшыларды әуежайдан қарсы алған соң іс-шара Ж. Үшкемпіров атындағы Тараз-арена спорт сарайында жалғасты.Төртжылдықтың басты бәсекесінде ел байрағын биіктеткен спортшыға жерлестері «Toyota 70» маркалы автокөлігі мен екі бөлмелі пәтер кілтін табыстады. Ал жаттықтырушысы Саттар Бейсембаевқа «Haval» автокөлігін мінгізді. Паралимпиада жүлдегерін облыс әкімі Ербол Қарашөкеев өзі құттықтап, сыйлықтарын тарту етті.
