Су ресурстары және ирригация министрі Нұржан Нұржігітовтің тапсырмасы бойынша Жамбыл облысының су шаруашылығы саласына жүргізілген аудит материалдары Бас прокуратураға жолдады.
Осыған дейін судың «қара нарығымен» күресу және ашықтықты қамтамасыз ету мақсатында министрліктің Ішкі аудит департаменті Жамбыл облысы бойынша «Қазсушар» филиалына тексеріс жүргізген болатын. Нәтижесінде филиал директоры мен Шу-Талас бассейндік инспекциясының басшысы тәртіптік жауапкершілікке тартылды. Анықталған құқық бұзушылықтарды одан әрі қарау үшін аудит материалдары ҚР Бас прокуратурасына жіберілді.
Естеріңізге сала кетейік, министрлік мамандары Жамбыл облысында жүргізген аудит барысында су ресурстарын заңсыз пайдаланудың 10-ға жуық фактісін, сондай-ақ шаруалармен суармалы су беру келісімшарттарын жасау барысында заң бұзушылықтарға жол бергенін анықтаған болатын.
«Судың «қара нарығымен», яғни су ресурстарын заңсыз пайдалану фактілерімен күрес жалғасады. Заңды бұзған барлық құқық бұзушылар мен басшылық лауазымдағы қызметкерлер жауапқа тартылады. Біз су ресурстарын пайдалануды бақылауды күшейтеміз. Ол үшін қолданыстағы заңнамаға өзгерістер енгізу ұсынылып отыр», — деді Су ресурстары және ирригация министрі Нұржан Нұржігітов.
Осыған дейін Жоғары аудиторлық палата тексерісінің қорытындысы бойынша «Қазсушар» мекемесінің басшылық лауазымдағы 5 қызметкері жауапқа тартылған болатын.
ҚР Су ресурстары және ирригация министрлігінің баспасөз қызметі
