Қазақ тілі – Қазақстанда тұратын, оны Отаным деп қабылдайтын, өзін Қазақстанның патриотымын деп санайтын азаматтардың тілі.
Сондықтан сіз қай ұлттың өкілі болмаңыз, тіл үшін күресуге міндеттісіз! Сол тілде сөйлейтін соңғы адам болсаңыз да, тіліңіз жайында аманат қалдыруға, мұра қалдыруға тырысуыңыз керек. Себебі сіздің тілде жазылған құнды тарихи деректер, кейінгі ұрпақ үшін үлкен рөл ойнауы мүмкін. Бүгінгі заманда бірнеше тілді меңгергеннің артықшылығы жоқ. Тіл – ең ұлы қару. Тіл – ең асыл құндылық.
Мен қызмет атқарып жүрген Жамбыл облысы қылмыстық істер жөніндегі мамандандырылған ауданаралық сотында түрлі істерді жүргізуге тура келеді. Сол істердің 90 пайызына жуығы қазақ тілінде жүргізіледі. Жалпы мемлекетіміз тәуелсіздік алғалы қөптеген салалар ішінде сот жүйесі алғашқылардың бірі болып мемлекеттік тілдің тұғырын биікке көтеруші болғанын бірі білсе, бірі біл бермейді. Себебі қазіргі уақытта іс-қағаздары жүйесі мемлекеттік тілде әбден пысықталып біріздендірілген. Сондықтан қазақ тілінің мәртебесін асқақтатуда тағы бір ерекше жайттармен бөлісер болсам, ертедегі қара қылды қақ жарған билеріміздің ісін жалғастырушы сот қызметіндегі аға-әпкелеріміздің көпшілігі би-шешендер секілді 2 тілде де сөзге шебер көсемсөз иелері екеніне жайлап көзім жетіп жүр.
Сол себепті заман жаңғырып, уақыт өзгерген тұста ұлттық құндылықтарымыздың қадіріне жетуге бір кісідей жұмылғанымыз жөн дегім келеді.
Шындығында тіл мәселесі өте нәзік, оны шынайы ынталылықпен, ұқыптылықпен үйлестіре отырып игеру қажет. Тіл-сан ғасырлық тарихи мәні бар тәжірибені, өнерді, мәдениетті ұрпақтан ұрпаққа жеткізетін құрал десек, оны игеруге мүмкіндік ашатын да-тіл. Сондықтан да тілді ұлттық мәдениеттің, өнердің айнасы деп атай аламыз. Тіл-тек қатынас құралы емес, ұлт пен ұлттың арасындағы мәдени қатынас жасаудың негізгі көзі де. Оны мемлекеттік тіл ретінде қастерлеп үйрену — елдің барша азаматтарының парызы.
Қорыта айтқанда, Қазақстанда мемлекеттік тілді дамытқымыз келсе, тілдердің дүниежүзілік даму заңдылығын білуіміз қажет. Тіл екі түрлі бағытта — қоғамның ықпалымен және өзінің ішкі заңдылығы арқылы дамиды. Біз, тіл жанашырлары, осы құбылыстарды басшылыққа ала отырып, отаршыл тілдер үстемдігіне төтеп беріп, интернет жүйесіне тілімізді қосып, заман ағымына, заман көшіне қосылғанымыз дұрыс болады.
Жамбыл облысы қылмыстық
істер жөніндегі мамандандырылған
ауданаралық соты әкімшісінің бас
маман-сот отырысының хатшысы Қ.Омарқұлов
