Бүгінде қоғамның басты қозғаушы күші болып табылатын жастарға мемлекет тарапынан көптеп көңіл бөлініп келеді. Олардың шетелдің іргелі оқу орындарында еркін білім алып, ғылым саласында жетістікке жетуге бар жағдай жасалған. Сондай-ақ елімізде жүріп-ақ өнерін өрістетіп, кәсібін дөңгелетемін дегендерге де ешқандай кедергі жоқ. Бұдан өзге түрлі жобалар қолға алынып, іске асырылуда. Әрине, мұның барлығы жастардың жарқын болашағы мен еліміздің ертеңі үшін. Мәселен, сондай бастаманың бірі –жастар корпусын дамыту жобасы.
Аталған жобаның Тараз қаласындағы жеңімпаздарының бірі «Тақымды тұлға» ұлттық ат ойындары үйірмесі» кіші жобасы. Бұл бастаманың қайтарымсыз грантының арқасында Гүлжан Қожагелдинова бастаған топ мүшелері қала жастарын ұлттық ат спорты түрлеріне үйретуді мақсат тұтқан. Бүгінде жобаның жеңімпаздары жоба арқылы жеңіп алған ақшаларына мінуге қолайлы бірнеше жылқылар сатып алып, қала жастарына теңге ілу, аударыспақ, көкпар, жамбы ату, қыз қуу секілді ұлттық ойындарды үйретуде. Сондай-ақ ежелден халқымыздың айнымас серігіне айналған жылқыға мүлде міне алмайтын жастарды атқа етене жақындастырып, салауатты өмір салтын қалыптастыруға өз үлестерін қосып келеді. Айта кетерлігі, жоба жеңімпаздарының кез келген атқа мінуді үйренгісі келетін қызығушылылығы жоғары әрбір жасқа есігі әрдайым ашық.
– Елбасының «Ұлы даланың жеті қыры» атты мақаласында атқа міну мәдениетіне қатысты сөзбен ғана айтып қоймай, оны ат әбзелдерімен, киген киімдерімен үйлестіре зерттеу керектігіне баса тоқталған болатын. Жалпы, атқа міну мәдениеті мен жылқы шаруашылығы жер жүзіне Ұлы даладан тарағаны тарихқа таңба басқандай белгілі. Расында, әлімсақтан қолға үйретіліп, адамзат баласының қажетіне жаратқан жылқы түлігі көшпенділердің ең қасиетті, ең қадірлі малы. Сол себептен бүгінгі қазақтың жастары атқа міне алмаса өзімізге сын. Сондықтан «Жас Проект» жобасы арқылы «Тақымды тұлға» ұлттық ат ойындары үйірмесі» кіші жобасын іске асыруды қолға алдық. Бүгінде қала жастары атқа мінуге көптеп келіп, ұлттық ат ойындарын үйренуге қызығушылықтары артып жатыр. Айта кететінім, мүлде атқа мінбеген жастарда келуде. Жоба бойынша алты ай ішінде 250 қала жастарын қамту көздеп отырмыз, – дейді топ мүшесі Ғазиз Сандыбекұлы.
Расында, ұланғайыр даланың, ұлан байтақ өлкенің ұлы тұрғындарының тыныс-тіршілігі, өмір-салты, өнер-білімі, әдет-ғұрпы, салт-санасы, салтанаты, бір сөзбен айтқанда бүкіл мәдениеті жылқы түлігімен тығыз байланысты. Осыны ескерген Елбасы Н.Назарбаев «Ұлы даланың жеті қыры» атты мақаласында атқа міну мәдениетіне ерекше тоқталып отыр. Сол секілді жоба мүшелері де атқа міну мәдениетімен қатар, ұлттық ат спорты түрлеріне дәріптейтін бастамаларының аяқсыз қалмағанын тілейді. Сондықтан олар «Жас Проект» жобасы өз мәресіне жеткен соң облыс басшылығы мен жастар саясатына қатысты мекемелерден қаржылай қолдаудың боларынан үмітті. Өйткені, атқа міну мәдениетін қайтадан жаңғыртып отырған жобаның нәтижесі қазірдің өзінде көңіл қуантарлықтай. Себебі қазірдің өзінде ат құлағында ойнағысы келетін жастардың бір шоғыры пайда болды. Ал олардың талпынысын орта жолда қалдырсақ барлығымызға сын.
TURANINFO.KZ
