2017 ЖЫЛЫ ЕҢ ҚЫМБАТ КӨЛІК КІМ САТЫП АЛДЫ?
Күні бүгін Астана қаласының әкімі Асет Исекешов мемлекеттік қызметтік көліктен таксиге көшу керектігін баса айтты. Ал 2017 жылы Жамбыл облысына қарасты мекемелер жаңа көлік мінуге қанша қаражат жаратты?
Барлық соманы Жамбыл облысы әкімдігі қаржы басқармасы айтып берер. Ал біз қымбат деген 10 көліктің құны – 138 млн. екенін анықтадық.
Бұл сауалға жауапты goszakup.gov.kz сайтынан іздеп көрдік. Нәтижесі мынадай 1 — орын 22 млн-ға «Жамбыл облысы әкімдігінің дене шынықтыру және спорт басқармасы «Тараз» кәсіпқой футбол клубы» коммуналдық мемлекеттік қазыналық кәсіпорны Дүйсембаев Махамбет Ахметұлына тиесіл. Клубымыз 1-ші лигаға ұшып кетсе де, басшысы жылы көлікте отыра бергісі келетіні көрінеді. Сен тимесең, мен тиме дегендей…
2 орында «Минивэн» типтес көлікті 15 млн-ға алған «Жамбыл облысы әкімдігінің құрылыс, жолаушылар көлігі және автомобиль жолдары басқармасы» КММ. Жаңа басышыға жаңа көлік керек болған, сірә? Өз қалтасы емес, үкіметтікі деп жүрген болар.
3 орын. Бұндай мекеме бар екенін өз басым енді білдім. Қаншалықты қажеті бар? «Жамбыл облысы әкімі аппаратының мамандандырылған базасы» коммуналдық мемлекеттік мекемесіне 15 млн. теңге құрайтын көліктің не керегі бар? Ұсынылатын отыны АИ-95 маркалы жанармайға қалай қарайсыздар?
4 орын. Меркі ауданы әкімінің аппараты 13 млн 800 мыңға жаңа көлік алыпты. Аудан әкімі жоғары класстан орташа классты таңдағаны көрініп тұр.
5 — 6 орын. Ауыл шаруашылық басқармасының басшысы Нұржан Молдиярұлы Нұржігітов 13 млн 300 –ға қоса 12 млн 500 екі жаңа көліктің үстінде жүр екен. Ауыл шаруашылық өнімдеріне субсидия беретін мекеменің көліктері ауылдарды аралаймын деп шаршап қалған болар…
7 орын. Жомарт Амангелдіұлы кетіп бара жатырып 12 млн. 300 мыңға жаңа көліктің қызығын көріп бара жатыр еді. Қызметін ауыстырып Гүлдана Әлімжанқызы Жауынбековаға бұйырыпты (Г.Жауынбекова облыс әкімдігінің экономика және бюджетті жоспарлау басқармасының басшысы).
8 орын. Қаржымен айналысатын Гамлет Төреханұлы бастайтын мекеме 11 млн 600 мың тұратын су жаңа көлікпен жүр. Бюджеттің орындалуын қадағалайтын әкімдіктің басқармасы бұл.
9 орын. «Жамбыл облысы әкімдігінің дене шынықтыру және спорт басқармасы «Жоғарғы спорт шеберлігі мектебі» коммуналдық мемлекеттік қазыналық кәсіпорынының директоры Қылышбаев Пархат Әуесұлы өзін басқарма басшысы немесе аудан әкімінің «С» класты көлік мініп жүргенің кім біледі? Көлігінің құны 11 млн. 400 мың.
10 орын. Жаңа басшы келді! Тілдерді дамытудан ішкі саясат басқармасының қызу жұмысына, рахметі айтылмайтын басқарманың отына кіріп күліне шығам деп, 11 млн. 300 мыңға көлік мінуден бастау алыпты.
Осыдан-ақ жас ұрпақтың неге шенеунік болғысы келетіндігін аңғаруға болады.
TURANINFO.KZ
