2 ТОННАҒА ЖУЫҚ ЕСІРТКІ ЗАТЫ ТӘРКІЛЕНДІ
ҚР ІІМ Есірткі бизнесіне қарсы күрес департаменті, Жамбыл облысы және Байзақ ауданы ауданаралық есірткі бизнесіне қарсы күрес бөлімі қызметкерлерімен бірлесе жүргізілген «Көкнәр — 2017» жедел алдын алу іс-шарасы барысында 2 тоннаға жуық есірткі заты анықталып, тәркіленді.
«Жусанды» аумағында заңсыз есірткі саудасымен айналысушы Тараз қаласының 56 жастағы тұрғынынан 730 келі «кептірілмеген марихуана» және 3 келіден астам «кептірілген марихуана» анықталса, «Есқара» аумағында осындай қылмыстық іспен бұрын сотты болған Жамбыл ауданының 36 жастағы тұрғынынан 1 тонна 220 келі салмақта «кептірілмеген марихуана» және 20 келіден астам «кептірілген марихуана» тәркіленген.
Жауап алу барысында күдіктілер өз кінәсін толықтай мойындап, Байзақ ауданы уақытша ұстау изоляторына қамаққа алынды.
Аталған екі дерек те ҚР ҚК-нің 296-бабы, 4-бөлігімен аса ірі көлемдегі есірткі заттарын сақтау ретінде сотқа дейінгі тергеп-тексеру тізіліміне тіркелді.
Бап бойынша үш жылдан жеті жылға дейін бас бостандығынан айыру жазасы қарастырылады.
Ағымдағы жылдың 8 айы ішінде аса ірі көлемдегі есірткі затын тәркілеу бойынша жалпы салмағы 12 тоннаны құрайтын 14 дерек тіркелген.
Жамбыл облысы ІІД Баспасөз қызметі
