Мониторингке өңірдегі 7 саяси партия – «Әділет», Respublica, ЖСДП, «Ауыл», Қазақстан Халық партиясы, «Ақ жол» демократиялық партиясы және «BAYTAQ жасылдар» партиясы қамтылды.
Мониторинг нәтижесі сайлауалды кезеңде партиялардың әлеуметтік желідегі белсенділігі артқанын көрсетті. Негізгі контент кандидаттардың сайлаушылармен және еңбек ұжымдарымен кездесулеріне, үгіт-насихат жұмыстарына, сайлауалды бағдарламаларды таныстыруға және партиялық іс-шараларға арналды.
Төрт апта ішінде 7 партияның Instagram парақшасында барлығы 1 263 жарияланым орналастырылған.
Жарияланымдар саны бойынша «Әділет» партиясы көш бастады – 491 пост. Одан кейін «Ауыл» партиясы – 253, Respublica – 176, «Ақ жол» демократиялық партиясы – 166, Қазақстан Халық партиясы – 85, «BAYTAQ жасылдар» партиясы – 50, ЖСДП – 42 жарияланым орналастырған.
Партиялардың ақпараттық жұмысында дәстүрлі посттармен қатар Reels, фото және қысқа бейнематериалдар да белсенді қолданылған. Контенттің басым бөлігі тұрғындармен тікелей байланыс орнатуға, кандидаттарды таныстыруға және сайлауалды бағдарламалардың негізгі бағыттарын түсіндіруге бағытталған.
Жалпы мониторинг Instagram желісінің өңірдегі саяси партиялар үшін сайлауалды ақпаратты жедел тарату, өткізілген кездесулер мен іс-шараларды көрсету және бағдарламалық ұстанымдарды тұрғындарға жеткізудің негізгі цифрлық арналарының бірі ретінде пайдаланылғанын көрсетті.
