Жамбыл облысы әкімдігінің дін істері басқармасы мемлекеттік тапсырыс арқылы «Қоғамда радикалдық идеологияға қарсы иммунитет пен діни негіздегі экстремистік көріністеріне мүлдем төзбеушілікті қалыптастыру мақсатында діни ахуал шиеленістерінің ықтимал тәуекелдері басым облыстағы аудандарда профилактикалық кешенді іс-шараларын ұйымдастыру» және «Дін саласындағы ақпараттық-түсіндіру тобының іс-шараларын ұйымдастыру және өткізу жұмыстары қызметі» тақырыбында екі жоба жүзеге асырылуда.
Алғашқы жоба бойынша а.ж. Байзақ, Жамбыл, Меркі аудандарының тұрғындары арасында Республикалық ақпараттық-түсіндіру тобының мүшелері, исламтанушы С.Еншібайұлы және «Нұр-Мүбәрак» университеті жанындағы «Діни экстремизмге қарсы күрес орталығының» директоры Т.Нүсіпхановтардың қатысуымен ақпараттық-түсіндіру жұмыстары жүргізілді. Сонымен қатар, жоба аясында жоғарыда аталған аудандардың орталықтарында теріс діни ағымдардың зияны туралы терең түсіндіретін, облыстық кино орталығы тарапынан түсірілген «Сағым» филімінің тегін көрсетілімдері ұйымдастырылды. Бұл бағыттағы жұмыстар Қордай және Шу аудандарында өз жалғасын табатын болады.
«Дін саласындағы ақпараттық-түсіндіру тобының іс-шараларын ұйымдастыру және өткізу жұмыстары қызметі» жобасын жүзеге асыру мақсатында наурыз-маусым айларында жыл басында бекітілген желілік кестеге сәйкес Тараз қаласы мен аудандардағы әр түрлі мақсатты топ өкілдерімен (мемлекеттік қызметшілер, жастар, еңбек ұжымдары, әскерилер, құқық қорғау органдарының қызметкерлері, өзін өзі қамтушы азаматтар, жұмыссыздар, мешіт жамағаттары т.б.) 176 іс-шара өткізіліп, 3500-ден астам адам қамтылды. Іс-шараларға облыстық АТТ құрамындағы дінтанушы, теолог мамандармен қатар, облыстағы жоғары білімді мешіт имамдары да тартылды.
Бұдан бөлек, облыс әкімінің тапсырмасына сай «Бейбітшілік пен келісім» жобасы аясында өткен жылдан бері барлық аудандарда кешенді жұмыстар атқарылды. Нәтижесінде, 188 іс-шара өткізіліп, 4000-ға жуық адам қамтылды. Іс-шаралар аясында теріс діни ағымдардан зардап шеккен азаматтармен сұхбаттар өткізілді; «Жусан» операциясы аясында оралған азаматтардың әлеуметтік және тұрмыстық проблемалары толығымен шешілді; Тұрғындардың, ақсақалдар мен аудан имамдарының қатысуымен қоғамдық қабылдаулар мен кездесулер өткізілді; «Зайырлылық және дінтану негіздері» мұғалімдеріне семинарлар ұйымдастырылды.
Материал Жамбыл облысы әкімдігінің ішкі саясат басқармасының тапсырысы бойынша дайындалды
