Бұл күні «Жол активтері сапасының ұлттық орталығының» Жамбыл, Шымкент, Түркістан және Қызылорда облыстарындағы филиал ұжымдары қыдыр қонып, құт дарыған, шежірелі өлке – Қасқасу баурайында тойлады.
Берекелі басқосуға арнайы келген «ЖАСҰО» РМК бас директорының орынбасары Арман Мерекеұлы жиналғандарды тамырын тереңнен тартқан Наурыз мерекесімен құттықтап, салт-дәстүрлерімізді дәріптейтін мұндай думанды жиындар өскелең ұрпақтың елін сүйер азамат болып өсуіне үлкен септігін тигізетінін баса айтты.
Бұл күні кең пейілді түркістандық жолшылар қазан көтеріп, мейман боп келген әріптестері үшін Наурыздың басты дәмі – Наурызкөже дайындады. Бұдан бөлек, мұнда тұсаукесер сынды қазақтың салт-дәстүрі қайта жаңғыртылып, қаймағы бұзылмаған қазақ ауылының көрінісі паш етілді. Сондай-ақ, жолшылар садақ атудан сынға түссе, құралайды көзге атқан сұрмерген һәм білекті жігіттер асық ату мен қошқар көтеру сайыстарында өзара кім мықтыны анықтады.
Қасқасу баурайында ұйымдастырылған ашық аспан астындағы Наурыз тойға жамбылдық жолшыларды филиал директоры Телеужан Ержан бастап барды. Өз кезегінде біздің жолшылар сәлемдесу сайысында өзгелерден оқ бойы оза шапты. Халық әні «Күміс құман-ай» әнінің мәнерінде өрілген өлең жолдарын домбыраның сүйемелдеуімен нақышына келтіре шырқаған олардың өнеріне жиналған жұртшылық таңданысын білдірді. Сондай-ақ, біздің қыз-жігіттер асық ату мен қошқар көтеру жарыстарында да жүлдесіз қалған жоқ. Мәселен, зертхана меңгерушісі Дәурен Хасенов сұрмергендігімен көзге түссе, «Сапа және мемлекеттік есеп бөлімінің» басшысы Мадияр Мырзалимов театрландырылған қойылымда актерлік шеберлігі барын байқатты. Ал, ұлттық нақышта безендірілген киім киген әулиеаталық арулар көздің жауын алды. Осылайша, біздің бұрымдылар «Мөп-мөлдір көздің қарасын, Тараздан ғана табасың» деген Фирдоуси жырының жәй ғана сәйкестік еместігін кезекті рет дәлелдеді.
Айта кетейік, оңтүстік өлкесінің жолшылары бірлесе тойлайтын Наурыз тойы бірер жыл бұрын көне шаһар Тараздан бастау алған еді. Думанды шара былтыр шырайлы Шымкентте ұйымдастырылса, келер жылы алты Алаштың анасы атанған қасиетті өңір Қызылорда қаласында өтеді деп жоспарлануда.
