Жамбылдықтар «Рухани жаңғыру» бағдарламасы аясында өткен «Бір сәби – бір ағаш» акциясынде белсенділік танытты.
Мемлекет Басшысының «Рухани жаңғыру» Бағдарламасы аясында облыс аумағын жасыл желекке айналдыру, өскелең ұрпақтың бойында туған жеріне деген сүйіспеншілігін арттыру, Жер Ананы аялауға шақыру, патриотизмді нығайту мақсатында Жамбыл облысының барлық аудандары мен Тараз қаласында бір мезгілде «Бір сәби – бір ағаш» акциясы өтті.
Халықтық шараны өткізудегі негізгі мақсат – дүниеге жаңа келген нәрестеге «Ағаш бұтақтарындай жайқалып өсіп-өнсін» деген ізгі ниет білдіру және Мемлекет Басшысының «Егер біздің азаматтарымыз өздерінің ауыл маңдарында, өз үйлерінің айналасына, барлық облыстық, қала орталықтарында жыл сайын ағаш отырғызатын болса, біз жасыл ел құрамыз. Мен мұны үлкен іс деп санаймын. Барша қазақстандықтарды жыл сайын ағаш отырғызуға шақырамын» деген тапсырмасын орындау.
Аталған акция өңірде алдағы уақытта дәстүрлі түрде үнемі жүргізіліп отыратын болады. Шарада арнайы белгіленген орындарда дүниеге сәби әкелген ата-аналар көпжылдық ағаштар отырғызды. Сөйтіп отырғызған ағаштарының паспорты олардың өздеріне табыс етілді. Жыл өткен сайын облыстағы бақтардың шекаралары кеңейіп, тұрғындардың демалыс орнына айналмақ.
Сенбі күні өткен акция барысында облыс орталығы мен аудандарда барлығы 615 ағаш отырғызылды. Ал өңірде қазан айында 2829 сәби дүниеге келген.
TURANINFO.KZ
