Жамбылда көптен күткен шипажай ашылды
Бүгін Жамбыл ауданы, Айша бибі ауылдық округі, Қызылтаң ауылында көптен күткен «Айша бибі» шипажайының ашылу рәсімі болды.
Салтанатты шарада аймақ басшысы Кәрім Көкірекбаев сөз сөйлеп, облыс тұрғындарының денсаулығын жақсартуда атқарылып жатқан жұмыстарға бірқатар тоқталып өтті.
— Денсаулық саласын дамытудың «2016-2019 жылдарға арналған «Денсаулық» мемлекеттік бағдарламасы» аясында бұл ғимаратқа өзінің бастапқы мақсатты фунциясы қайтарылды. Яғни, бүгін «Айша бибі» балшықпен емдеу-оңалту шипажайы қайта пайдалануға беріліп отыр. Мемлекеттік бюджеттен шипажай ғимаратының күрделі жөндеу жұмыстарына 520 млн. теңге, оның материалдық-техникалық базасын нығайтуға 354 млн. теңге көлемінде қаржы бөлінді, — деді Кәрім Насбекұлы.
Айта кетерлігі, ғимарат алдында жүйке аурулар интернат үйі болған.
Қазіргі санаторийдің жалпы алаңы 4378,0 шаршы метр және 4 корпустан құралған. Жаңа медициналық мекемеде медициналық қызметкерлердің жалпы саны 151-ді құрайды, оның ішінде дәрігерлер — 16, ал орташа медициналық қызметкерлер — 30.
Терапевт, ортопед, уролог, гинеколог, дәрігер-реабилитолог, стоматолог, УДЗ дәрігері, кардиолог, невропатолог және т.б. дәрігерлер сырқаттарды қабылдау жұмысын жүргізеді. Бас дәрігер – Қуатжан Тұрысбеков.
120 төсекке арналған шипажай Жамбыл облысының тұрғындарына мамандандырылған медициналық көмек көрсетуге бағытталған, сондай-ақ мұнда тірек-қимыл аппаратының, жүйке жүйенің, тері, хирургиялық, әйелдер мен еркектердің жыныстық ауруларын кешенді емдеу бойынша қызметтер көрсетіледі.
Шипажайда емдеу процедураларының келесі түрлері ұсынылған: бальнеоемдеу, балшықпен емдеу, тұзды ванналар, емдік душтар: циркулярлық және Шарко душы, физиоемдеу, ЛФК, тұзды шахта, кедр бөшкелері. Сонымен қатар, шипажайға облыста теңдесі жоқ буындарды дамытуға арналған Артромот қондырғысы алынды.
Сонымен бірге, шипажайға келушілердің емдеу курсынан өту ұзақтығы — 13 күн.
Фото: Ағаділ Рысмахан;
