Жамбыл облысында жерлерді тиімді пайдалануда 23 заң бұзушылық анықталған

Жамбыл облысы әкімдігінің жерлерді пайдалану және қорғалуын бақылау басқармасының мамандары 2017 жылдың есепті мерзімінде 67 тексеру жүргізіп, 23 заң бұзушылық анықтады. Заң бұзушылықтар бойынша 13 ескерту және 10 тұлғаға 3,35 млн.теңге көлемінде айыппұл салынды. Мұндай тың ақпаратты Өңірлік коммуникациялар қызметінде өткен брифинг барысында Жамбыл облысы әкімдігінің жердің пайдалануы мен қорғалуын бақылау басқармасының басшысы Серікбай Тәпеев мәлімдеді.
Серікбай Мырзалыұлының сөзіне сенсек, айыппұл салынған 5 тұлға 0,96 млн.теңге айыппұлды төлесе,1 тұлғаға салынған 0,23 млн. теңге көлеміндегі айыппұл сот арқылы мәжбүрлеп өндірілсе, осындай өз еркімен төлемей отырған 4 тұлғадан 2,16 млн. теңге айыппұлды мәжбүрлеп өндіру шаралары қолданылуда. Осы заң бұзушылықтардың ішінде 9 тұлғаға ҚР Әкімшілік құқық бұзушылық туралы кодексінің 136 бабы бойынша яғни, жерді өз бетінше иелену немесе жер пайдалану мерзімінің аяқталуына байланысты, ал 1 заңды тұлғаға жерді бүлдіру фактісі бойынша айыппұл салынды.
Облыс орталығында жер учаскесінің нысаналы мақсатын бұзу фактілері жиі орын алып келеді. Осы заң бұзушылықтың түрі бойынша ескерту алған 13 тұлғаға 3 ай мерзімде заң бұзушылықты жою туралы нұсқама беріліп, заң бұзушылықтың жойылуы тұрақты бақылауға алынған.
Бұдан бөлек ауыл шаруашылығы мақсатындағы жерлерді пайдаланушы 4 тұлғаға әкімшілік іс қозғамай жер заңнамасының 92 — 94 баптарына сәйкес жерді игеру қажеттігі туралы 1 жылдық нұсқама берілді, — деді ол.
Жалпы пайдаланылмаған ауыл шаруашылығы жерлерін тексеру ағымдағы жылғы 4 а/ш статистикалық есебі және 2016 жылы 1 жылдық мерзімге берілген нұсқамалар негізінде атқару жоспарланып отыр. Қайта тексерілетін ауыл шаруашылық субъектілерінің жалпы саны – 104. Тексерілетін жердің ауданы 16,5 мың гектарды құрайды.
Сонымен қатар 2016 жылы жерлерін пайдаланбаған жер иелері мен жер пайдаланушылардың тізімін 10 еселенген жер салығын өндіру үшін мемлекеттік кірістер департаментіне жолданып, аталған мекеме тарапынан шара қолданылды.
Жерді ұтымды пайдалану мәселесінде, бірінші кезекте жылдар бойы айналымнан шығып қалған егістік жерлерді пайдалану мәселесі өз шешімін таппай келе жатқандығын атап өту керек. Мұндай жерлер Мойынқұм, Талас, Сарысу аудандарының бұрынғы суармалы егістіктерінде үлкен көлемде орын алып отыр. Басты себеп, алқаптардың ағын сумен қамтамасыз ету мүмкіндігінен айрылғандығы, жердің сортаңдануы және тұздануы.
Яғни, алқаптарды күтіп баптап ұстау мәселесінің туындауынан, шөлейт аймақтарда орналасқан аудандар суармалы егістіктерінің бірқатар бөлігін іс жүзінде жоғалтқан. Сондықтан ең бірінші кезекте алқаптарды ағын сумен, оның ішінде су үнемдеу технологиясын қолдану арқылы сумен қамтамасыз ету мәселесін шешу қажет. Қаржылық жағынан аудан бюджеттері көтермейтіндіктен, облыс және республикалық бюджеттерден қаржы бөлуге бағытталған шаралар жүргізу кезек күттірмейтін мәселе. Айналымнан шыққан егістік жерлерді қайта қалпына келтіру мәселесіне ауыл шаруашылығы, жер қатынастары және кәсіпкерлік мекемелері тығыз байланыста атсалысуы абзал. Себебі, мұндай жерлерді қалпына келтіріп игеруге үлкен көлемде инвестиция тартпай жерді ұтымды пайдалану мәселесін шешу мүмкін емес, — деп баяндамасын түйіндеді басқарма басшысы.