Ардақты да құрметті мамандықтың бірі – дәрігерлер. Оларды “Ақ желенді абзал жандар, адам жанының арашашысы” деп жатамыз. Қалай атасақ та артықтық етпейді. Өз ісiне тиянақтылығы мен жылы сөзі, ізгі лебіздерімен адам жанын жадыратып жүрген жандар туралы айтылар сөз аз емес.
Жуалы аудандық орталық ауруханасының хирургия бөлімінің меңгерушісі Қалдыбай Дөнеш-Оғлыны Байрамов – өз ісін жетік меңгерген, білікті де тәжірибелі, жоғарғы санатты хирург, дәрігер. Аудандық ауруханада 30 жылдан астам уақыттан бері қызмет етуде, әрбір емделуші адамдардың жағдайын жасап, олардың тез жазылуына ықпал етіп келеді.
Қалдыбай Дөнеш-Оғлы Байрамов 1964 жылдың тамыз айында, Оңтүстік Қазақстан облысында дүниеге келген. 1983 жылы Қарағанды мемлекеттік медицина институтына түсіп, аталған институтты емдеу ісі мамандығы бойынша бітіріп шығады. Жуалы аудандық орталық ауруханасында хирург ретінде қабылданған ол осы уақытқа дейін сәтті оталар жасап, қазір хирургия бөлімінің меңгерушісі, ішкі аудит бөлімінің басшысы, Жуалы аудандық маслихат депутаты атанды. «Балалардағы шұғыл-жәрдем хирургиясы», 2016 жылы «Травматология және ортопедия» мамандығы бойынша, «Наркологиялық сараптаманың мәселелері», «Акушерия-гинекология» бойынша біліктілігін арттырып, қайта даярлаудан өткен. Өмір бойы үйренуден жалықпай, халық денсаулығын арттыру жолында аянбай еңбек етіп келе жатқан Қ.Байрамовты Жуалы халқы жақсы біледі. Хирург ретінде ғана емес, жалпы дәрігер ретінде де аудан тұрғындарының ауруына – шипа, дертіне – дауа таба білетін ақ халатты абзал жанды ерекше қадір тұтады.
Жамбыл облысының деңсаулық сақтау басқармасының баспасөз қызметі
