ӘУЛИЕАТАДА 700-ДЕН АСТАМ КОММЕРЦИЯЛЫҚ ЕМЕС ҰЙЫМ ТІРКЕЛГЕН

Жамбыл облысы əкімдігі ішкі саясат басқармасы «Өңірлік коммуникациялар қызметінің» алаңында Қазақстанның азаматтық альянсының вице-президенті Мұсағали Дуамбеков, «Азаматтық бастамаларды қолдау орталығы» КЕАҚ басқару төрағасы Нұрлан Өтешев, ҚР Қоғамдық даму министрлігі азаматтық қоғам істері комитетінің төрағасы орынбасарының міндетін атқарушы Гүлбара Сұлтанованың қатысуымен баспасөз конференциясы өтті. Спикерлер «Азаматтық және мемлекет: әріптестік пен жауапкершілік» форумының жұмысын қорытындылап, журналистердің сұрақтарына жауап берді.
Облыс әкімдігінің Ішкі саясат басқармасының ұйымдастыруымен Тараз қаласында үкіметтік емес ұйымдардың форумы өтті. Форумға 200-ден астам азаматтық қоғам, мемлекеттік орган, БАҚ өкілдерінің және Астана, Өскемен, Шымкент қалаларынан қонақтар қатысты.
Елдегі азаматтық қоғам рөлін нығайту, заңнаманы жетілдіру, азаматтық секторды дамыту жөніндегі жаңа тұжырымдамалық құжаттарды әзірлеу аясында елімізде және өңірлерде дәстүрлі сұхбат алаңы – үкіметтік емес ұйымдар Форумы өткізіледі.
«АЗАМАТТЫҚ ҚОҒАМ ЖӘНЕ МЕМЛЕКЕТ: ӘРІПТЕСТІК ПЕН ЖАУАПКЕРШІЛІК» форумның бағдарламасында үкіметтік емес сектор дамуының өзекті мәселелері бойынша сұхбат алаңдары, жергілікті мемлекеттік органдардың бірінші басшыларымен кездесулер, пленарлық отырыс ұйымдастырылады.
Онда:
азаматтық қоғам институттарының, халықаралық ұйымдардың, сарапшы қоғамдастықтың, оның ішінде, ҮЕҰ өкілдерінің қатысуымен азаматтық сектордың дамуының өзекті үдерістерін талқылау.
азаматтардың өмір сүру сапасын арттыру мақсатында мемлекет және азаматтық сектордың өзара іс-қимыл бағыттарын және түрлерін анықтау.
азаматтық секторды дамыту саласында үздік тәжірибелермен, құзіреттілікпен және өзара білім алмасу арқылы азаматтық қоғам институттарының тұрақтылығын арттыру мәселелері қаралады.
Жергілікті жерлерде азаматтарды шешімдерді қабылдауға тарту мәселелері бойынша ұсыныстарды талқылап, енгізу үшін Форумға ауылдық округтердің әкімдері де қатысады.
Бүгінгі таңда облыста 700-ден астам коммерциялық емес ұйымдар тіркелген, олардың 200-ден астамы белсенді қызмет етуде.
Үкіметтік емес ұйымдар мен биліктің өзара іс-қимылының маңызды бөлігі мемлекеттік әлеуметтік тапсырысты іске асыру болып табылады. Биылғы жылдың әлеуметтік жобалардың қаржыландыруы 814,8 млн теңгені құрады (облыстық бюджеттен – 262,8 млн тг., аудандық/қалалық бюджеттерден – 525,0 млн тг. бөлінді), бұл 2017 жылмен салыстырғанда 108,2 млн теңгеге артты.
Бүгінде үкіметтік емес ұйымдарды бағдарламаларды әзірлеп, іске асыруға, әлеуметтік маңызды мәселелер бойынша қоғамдық тыңдауларды өткізуге кеңінен тарту мемлекеттік органдардың күнделікті тәжірибесіне айналған.
Өткен жылдар ішінде мемлекеттік органдар мен үкіметтік емес ұйымдардың ынтымақтастығы жүйелі сипатқа ие болып үлгерді.
Қазіргі таңда үкіметтік емес ұйымдарға мемлекеттің тең серіктесі ретінде қарайды.