Тараз қаласының тұрғыны, жеке кәсіпкер Гүлнәр Абдуллаева қазақтың ою-өрнек өнерін қайта жандандырмақ.
Жиырма жыл бұрын тігін фабрикасында жұмыс істеген жеке кәсіпкер фабрика тоқтап қалған соң үйінде отырып тапсырыспен киім тіге бастаған. Іле саудаға шығып, Қытайдан тауар тасыпты. Дегенмен бұл жұмысты тастап, тігіншілікке қайта оралған. Бұл кәсіпке қайта оралуына Қытайдағы қазақтар себеп болған.
«Қытай тілін білмегендіктен сол елде тұратын қазақ қызын аудармашы етіп жалдағанбыз. Жұмыс бабымен жақсы араласып кеттік. Ол өзі ұзатылар кезде ауылына тойға шақырды. Мені таң қалдырғаны сондағы тігіншілердің қолынан шыққан ұлттық киімдер, көрпе- жастықтар мен киіз үйдің безендендірілуі болды. Қытайлық қазақ қызының ұзатылу тойынан кейін ойыма түрлі идеялар келді. Біз қарап тұрсақ, ою-өрнектің мағынасына мән бере бермейді екенбіз — дейді кейіпкер.
Гүлнәрдің сөзінше, қытайдағы қазақтарда әрбір ою-өрнектің өз мағынасы бар. Мәселен, шапапанның төменгі жағына ою-өрнек түссе, ол кісінің немересі бар дегенді білдіреді. Ал ою-өрнек арқасында орналасса ол кісінің шөбере сүйгендігінен белгі береді. Әйелдерде де сондай. Оның киіміндегі ою-өрнегіне қарап қай елдің қызы, қай руға келін болып түскенін білуге болады екен.
Кәсібін киіз үй жабдықтарын тігуден бастаған Гүлнар алдағы уаққытта қазақтың осы бір ұмыт қалған ою-өрнек өнерін дамытуды қолға алмақ.
Дереккөз Жамбыл облысының өңірлік коммуникациялар қызметі
