Қожа Ахмет Ясауи атындағы Халықаралық қазақ — түрік университетінде «Қазақ тілі – ғылым тілі: дәстүр және инновация» симпозиумы аясында жеміс-көкөніс өнімдерін қайта өңдеу бойынша өндірістік цех іске қосылды.
Цех ашылуына жиналған қауым алдымен өндіріс ғимаратын аралап, онда өнімнің толық даму циклімен және өндіріс процесімен танысты.
Оқу орнының ботаникалық бағында тұрғызылған жеміс жидектерін өңдеу жөніндегі өндірістік цех өз жұмысын ҚР Ғылым және жоғары білім министрлігіне қарасты «Ғылым қоры» акционерлік қоғамының қолдауымен, сондай-ақ «Инновациялық технологиялар негізінде биоресурстарды коммерциялық игеру арқылы Қ. А. Яссауи атындағы ХҚТУ ботаникалық бағының құнды генофондын сақтау» коммерцияландыру жобасы аясында бастады.
ҚР Ғылым және жоғары білім министрі Саясат Нұрбек цех жұмысына табыс тілеп, отандық ғылымды дамыту үшін осындай өндірістердің санын көбейту қажет екенін атап өтті. Сондай-ақ, ведомство басшысы жоба авторларының Қазақстанның өндірістік саласын дамытуға қосқан үлесін атап өтті.
Жобаның мақсаты – инновациялық технологиялар негізінде биоресурстарды коммерциялық игеру арқылы ботаникалық бақтың құнды гендік қорын сақтау, қалдықсыз өнім өндіру.
Өндірістік цех қазіргі заманауи құрал-жабдықтармен қамтамасыз етіліп, онда жемістерді жуу, кесу, кептіру, сұрыптау, орау, сақтау сынды қызмет түрлері орындалады. Өндірістік цехтің 1 тəулікте 5-7 тонна өнім қабылдап, қайта өңдеуге мүмкіндігі бар.
Алдағы уақытта, бұл өндірістік цехте қайта өңделген, табиғи кептірілген өнімдерді, оның ішінде кептірілген алма, алмұрт, өрік және тағы басқа өнімдерді Түркістан қаласына, ары қарай еліміздің басқа да қалаларына жеткізу жоспарлануда.
