Колхоздың сүт фермасындағы қызу еңбек толастаған ба? Сауыншы әйелдер күніне 25-30 сиырға дейін сауып, басшылық қойған межені орындауға тырысады. Жоспарға сәйкес жылына әр сиырдан 2300-3000 литрге дейін сүт өткізу керек. Міне, осылай күндер өтіп, жылдар жылжып жатты. 1972 жылы көп сауыншының қатарына 19 жастағы бойжеткен Алмагүл Райсова қосылды. Ол кезде жұмыстың көбі қол еңбегімен атқарылатын. Аз уақытта сауыншылардың алды болған Алмагүлдің есімі елге кеңінен таныла бастады. Еңбегі еленіп, партия қатарына өтті. Облыстық ХХ партия конференциясына сайланды. Қазақстан Компартиясы Жамбыл облыстық комитетінің және аудандық партия комитетінің мүшесі, үш мәрте облыстық кеңестің депутаты, Қазақстан Компартиясының ХVІ сеъзіне делегат болды. – 1976-1977 жылдары жұмыс механикаландырылып, көрсеткіштеріміз жақсарды. Жұмыс жолға қойылды. «Сиырдың сүті тілінде» емес пе, жем-шөптің мол қоры сүт көлемін арттырды. Оның үстіне колхоз басшысы Артур Роккель сиыр малын асылдандыру арқылы сиыр сүтінің көлемін арттыруға қол жеткізді. Әр сиырдан жылына 3500-4000 литрге дейін сүт сауатын болдық, — дейді озат сауыншы әңгіме барысында ағынан жарылып. Соның арқасында «Еңбек даңқы» ордені мен бірнеше медальдарды кеудесіне қадаған Алмагүл Райсованы бүгінгі күні ескерусіз қалдырған секілдіміз. Қазір осынша биік белестерді бағындырып, ел құрметіне бөленген сауыншыны біреу білсе, біреу біле бермейді. Алмагүлді ғана емес, шаруашылықтың әр саласында жемісті еңбек еткен ауыл еңбеккерлерінің қай- қайсысын да ұмыт қалдырып барамыз. Рухани жаңғыру аясында есімдерін жаңғыртып, жас ұрпақтың санасына сіңірсек, болмаса да ұқсап бағар ма еді, кім білсін
