Ағымдағы жылдың 29 маусымда Жуалы аудандық орталық емхананың лаборанты Фарида Жанбатырова Мемлекет басшысы Қасым-Жомарт Тоқаевқа видеоүндеу жолдаған болатын. Видеоүндеуде медицина қызметкері Фарида Қанатбекқызы карантин кезінде індеттің алдын алу шараларына байланысты бірінші бекетте рентген лаборант болып жұмыс істеген. Оның сөзінше, басшылар үкіметтен берілген қаржыны қайтаруын талап еткен.
«Қазақстан Республикасының Президенті Қасым-Жомарт Тоқаевқа! Мен Жанбатырова Фарида Қанатбекқызы 1995 жылдан бастап Жуалы ауданы орталық ауруханасына қарасты емханада рентген лаборант болып қызмет атқарамын. 2020 жылдың сәуір айынан бастап ауруханаға кіреберіс жердегі бірінші бекетте таңғы сағат 07:30-дан кешкі 17:30-ға дейін жұмыс істедім. Сәуір айында есепшотымызға айлығымызға қосымша ретінде үкіметтен 160 мың теңге түсті. Оған көп-көп рақмет айтамын. Енді біздің емхана басшылары осы 160 мың теңгенің 39 мың теңгесін қайтаруымызды талап етті. Неге деп сұрағанымда «Жоғарыдағы басшылардың талабы, соларға қайтарып береміз» деді. Бекетте отырған барлық қызметкерден ақшаны толық жинап алды. Менде сол ақшаны өз қолыммен апарып беруге мәжбүр болдым» делінген видеоүндеуде.
Видеодағы мәселе бойынша 2 шілде күні Жамбыл облысы әкімдігінің ресми сайтында төмендегідей ақпарат жарияланған болатын:
Әлеуметтік желілерде жарияланған Жуалы аудандық орталық ауруханасының медицина қызметкері Фарида Жанбатырованың өтініші бойынша ішкі тергеу жүргізу үшін Жамбыл облысы әкімінің тапсырмасы бойынша арнайы комиссия жіберілді.
Комиссия құрамына денсаулық сақтау басқармасының, облыс әкімі аппаратының қызметкерлері және қоғам өкілдері енген. Комиссия мүшелері медицина қызметкерлерімен, медициналық мекеме ұжымымен жеке кездесулер өткізіп, сондай-ақ анонимді сауалнама жүргізді.
Комиссияның алдына айтылған барлық фактілерді объективті және бейтарап түрде анықтау, емдеу мекемесі қызметкерлерінің құқықтарының бұзылуына жол бермеу бойынша нақты шаралар қабылдау міндеті қойылды.
Қызметтік тексерістің алдын ала нәтижелері бойынша Ф.Жанбатырованың кейбір дәлелдері расталды. Ұжымда жағымсыз моральдық-психологиялық жағдай қалыптасқан десек, оған ең алдымен емдеу мекемесі басшылығының өзінің кәсіби міндеттеріне жауапсыз қарауы әсер еткен.
Жіберілген бұзушылықтар үшін ОАА бас дәрігері Б.Алпысбай, бас дәрігердің экономика жөніндегі орынбасары А.Байтореев қызметінен босатылатын болады. Сондай-ақ, Жуалы ауданының әкімі Н. Ергебековке сөгіс жарияланады. Денсаулық сақтау басқармасы басшылығының жауапкершілігі карантин мерзімі аяқталған соң қаралатын болады.
Істің барлық материалдары құқық қорғау органдарына жолданды.
Қазақстан Ресубликасының сыбайлас жемқорлыққа қарсы іс-қимыл Агенттігі “ANTIKOR NEWS” телеграммдағы каналы арқылы 17 шілде күні «Жуалы ауданының орталық аудандық ауруханасы» ШЖҚ МҚК лауазымды тұлғаларына қатысты ақша қаражатын иемдену фактісі бойынша сотқа дейінгі тергеу басталды. Жамбыл облысының Сыбайлас жемқорлыққа қарсы қызметі Жамбыл облысының денсаулық сақтау басқармасының «Жуалы ауданының орталық аудандық ауруханасы» ШЖҚ МҚК лауазымды тұлғаларына қатысты медқызметкерлердің шағымдары бойынша сотқа дейінгі тергеу басталды. Тергеу «COVID-19» коронавирус инфекциясының пандемиясы жағдайында эпидемияға қарсы шаралар үшін осыған дейін еңбекақыға аударылған қосымша үстемақыдан ақша қаражатын иемдену фактісі бойынша жүргізілуде. ҚПК 201-бабына сәйкес тергеу мүддесі үшін өзге ақпарат жариялауға жатпайды” — деп мәлім таратқан болатын.
Ал, 9 қыркүйек күні Жамбыл облыстық Қоғамдық кеңесінің мүшесі, блогер Исламбек Дастан Жуалы ауданы орталық ауруханасына барып, бас дәрігердің жұмыста екендігі туралы хабарлады
Осы жәйт бойынша Жамбыл облысы әкімдігінің денсаулық сақтау басқармасы хабарлайды: Жуалы аудандық орталық ауруханасының бас дәрігеріне байланысты мәселе бойынша басқарма қызметкерлерімен арнайы жұмысшы тобы құрылып, зерделеу жұмыстары жүргізілген, оның барысында Жуалы аудандық орталық аурухана басшыларымен заң бұзушылықтар көрінісі байқалды. Жоғарыдағы мәліметтер негізінде аталған мәселе бойынша тиісті материалдар Қазақстан Ресубликасының сыбайлас жемқорлыққа қарсы іс-қимыл Агенттігінің (сыбайлас жемқорлыққа қарсы қызметтің) Жамбыл облысы бойынша департаментіне, өз құзіреттілігі шегінде қарау үшін жолданды. СЖҚІА Жамбыл облысы бойынша Департаментімен аталған арыздардың негізінде Жуалы аудандық орталық ауруханасының басшыларына қатысты қылмыстық іс тіркелген. Қазіргі таңда, аталған қылмыстық іс бойынша тергеп-тексеру аяқталған жоқ. Құзырлы органнан Жуалы аудандық орталық ауруханасы басшыларын жұмыстан шеттетуге қаулы берілген жоқ. Қажетті тергеу амалдары жүргізілуде.
Сондай-ақ, Жуалы аудандық орталық ауруханасы “Жуалы аудандық орталық ауруханасының бас дәрігері 5.10.2020 жылы еңбекке жарамсыздық парағының жабылуына байланысты міндетін атқару үшін жұмысқа қайта кірісті. 7.10.2020 жылы Жамбыл облыстық Денсаулық сақтау басқармасынан жұмысшы топ келіп, аурухана ұжымындағы моральдық ақуалды зерделеу үшін , қалыптастыру үшін аудандық аурухана қызметкерлерімен кездесті. Бұл жиналысқа бас дәрігер қатысқан жоқ. Қазақстан Республикасының Конституциясына сәйкес сот шешімі шықпай тұрып азаматты кінәлі деп тануға болмайды. Бейнежазбада көрсетілген уақытта бас дәрігер аудандағы денсаулық сақтау объектілерін жылыту мауысымына дайындығын тексеруге кеткен болатын” — деп пікір білдірді.
Сонда Жамбыл облысы әкімдігі таратқан ақпараттағы мәселе қайда? Неге үш ай еңбекке жарамсыз болған бас дәрігер кейін қайта ештеңке болмағандай жұмыс орнына келе салған дұрыс па? Әдеп нормалары сақталу жағдайы сақтала ма?! Ресми өкілдерден жауап күтіп, ары қарай бақылауымызда болады.
TURANINFO.KZ
