2016 жыл Жамбыл облысы үшін табысты жыл болды. Елдің экономикалық әлеуетін арттыруда маңызды рөл атқаратын өңірдің қазіргі әл-аухаты көңіл қуантады. Елбасының «Қазақстан жаңа жаһандық нақты ахуалда: Өсім, Реформалар, Даму» атты Жолдауындағы және «Бес институционалдық реформаның 100 нақты қадамы» Ұлт жоспарында айтылған міндеттер мен басымдықтарды басты бағыт етіп ұстанған облыстың жергілікті атқарушы органдары көп белесті бағындырды. Өңірде инвестиция, индустрияландыру және өнеркәсіп салалары бойынша көрсеткіш 2015 жылға қарағанда біршама өскен. 2016 жылы облыстың өнеркәсіп кәсіпорындарымен 339,1 млрд. теңгеге өнім өндірілді, нақты көлем индексі 102,4%-ды құрады (ҚР – 98,9%). Негізгі капиталға салынған инвестициялардың жалпы көлемі 215,4 млрд. теңгені немесе 2015 жылмен салыстырғанда 106,2%-ды құрады. Ал индустрияландыру бағыты бойынша 2016 жылы жалпы сомасы 20,5 млрд. теңгеге 10 инвестициялық жоба іске асырылып, онда 446 жұмыс орындары ашылды. Сондай ақ, кәсіпкерлікті қолдау Картасына еніп, іске қосылған инвестициялық жобалар бойынша өндірілген өнім көлемі 37,2 млрд. теңгені құрады. Облыстың сыртқы сауда айналымы 2016 жылы 411,2 млн. АҚШ долларын немесе 2015 жылмен салыстырғанда 116,8% құрады, оның ішінде экспорт – 195,6 млн. АҚШ долларын (176,9%), импорт – 215,6 млн. АҚШ долларын (89,3%) құрап отыр. Бөлшек сауда айналымының көлемі 217,5 млрд. теңгені құрап, 2015 жылмен салыстырғанда 0,4%-ға ұлғайды, көтерме сауда айналымы – 190,3 млрд. теңгені құрап, 24,8%-ға төмендеді. Есепті кезеңде нарықта және жеке кәсіпкерлік қызметпен айналысатын жеке тұлғалардың бөлшек сауда көлемі 2016 жылы 134,9 млрд. теңгені құрап, 2015 жылмен салыстырғанда 15,9%-ға өсті.
Арайлы Жақсылық
