Атақты жерлесіміз Вайт Талгаев күні кеше ғана «Тараз» футбол командасының бас бапкері болып тағайындалды. Ол 1953 — жылы өзіміздің өңірде дүниеге келген. Ұлты шешен. Кеңес Одағының еңбек сіңірген спорт шебері. Бүгінде ол Қазақстанның ең үздік бапкерлерінің қатарында. Футболшы ретінде мансабы айтарлықтай. Мәселен, ол КСРО- чемпионатының жоғарғы дивизионында ойнаған білікті спортшы. Сонымен қатар, кезінде азуын айға білеген Алматының «Қайрат» клубының да намысын қорғаған. Жаттықтырушы ретінде де тәжірибесі бар деуге әбден келеді. Атап айтқанда, әр жылдары Қазақстандық «Ертіс», «Жетісу», «Қайсар» клубтарының бас бапкері болған. Тіпті, Грозныйдың атақты «Терек» командасын жаттықтырып, сол құраммен Ресей кубогін де жеңіп алған. Бір айта кетерлігі Вайт Талгаев қай команданы жаттықтырса да өзінің асқан біліктілігімен есте қала алатын бапкер. Және ол жаттықтырған командалар жоғарғы орындардан көрінді. Сонымен қатар оның есімі «Тараз» футбол жанкүйерлеріне де жақсы таныс. Ол 1990-1992- жылдары Жамбылдық «Химик» командасын жаттықтырса, 1996- жылы Талгаевтың бапкерлігімен «Тараз» командасы алғаш рет Қазақстан чемпионы болды. 2010-2011 жылдардағы футбол маусымында тағы да «Тараз» командасын жаттықтырды. Одан кейінгі кезеңде Шешенстан елінде еңбек еткен. Міне, сәтін салып Вайт Талгаев енді 2017- жылғы футбол маусымында «Тараз» командасын жаттықтыратын болды. Енді биылғы футбол маусымында білікті бапкер «Тараз» клубын өрге сүйреп, бірінші лигадан жоғары лигаға шығарады деген сенім мол.
