Өткен жылы Тараз қаласына басшылыққа келген Рүстем Дәулет шаһарға бір жыл әкім болды. Нақтырақ айтқанда, 2017 жылдың 2-ші наурызында әкім болып тағайындалған болатын. Осы аралықта Рүстем Рысбайұлы қаланы «гүл» қылып жібермесе де артқа шегіндіре қойған жоқ. Яғни, Нұржан Календеровтың кезінде басталған тірліктерді тындырумен болды. Дегенмен, ауыз толтырып айтарлықтай жұмыстары да жоқ емес. Мәселен, ол биыл 7 жыл тазаланбаған каналдарды тазалауға айрықша көңіл бөлді. Осылайша, қоқысқа толып қалған су арналарының көзі ашылды. Сондай-ақ өткен ғасырдың аяғынан бері құрылысы тұралап қалған «сақалды» көпір пайдалануға берілді. Айша бибі көшесінің соңында орналасқан ол көпірге тіпті Елбасының өзі атбасын бұрған еді.
Тағайындаулар
Ол әкім болып келгеннен кейін бірқатар бөлімдерде ауыс-түйістер орын алды. Атап айтқанда, оның алғашқы тағайындауына Мүбәрак Жинақбаева ие болды. Рүстем Дәулет оны білім бөлімінің басшысы ретінде тағайындады. Сондай-ақ құрылыс бөлімінің басқарып келген Мақсат Нұржановтың орнына Ербол Амантаев тағайындалды. Кәсіпкерлік және өнеркәсіп бөлімінің басшысы ретінде Нұрзат Тұрысбеков келді. Өз кезегінде денсаулық сақтау бөліміне абыроймен басқарып келген Серік Қасмақасовтың орнын Индира Қарағаева басты. Тағы бір айта кетерлігі, қалалық мәслихаттың хатшысы болып Батырбек Құлекеев сайланды. Кезінде бірқатар аудандарға басшылық жасаған оның тәжірибесі мәслихатты шыққан биігінен түсіре қойған жоқ. Сонымен бірге қала әкімінің аппарат басшысы Жандос Өмірзақов өзіне орынбасар болып барып, оның орынына Барлыбай Мейірманов келді. Қорғаныс істері жөніндегі басқарманы басқарған Ермек Абдуллаевтың орынын Көпбосын Нураддинов басты.
Сәтсіз тағайындаулар
Қалалық жұмыспен қамту орталығының басқарып келген Сәуле Қойбақованың орынына Дүйсен Ильяс тағайындалды. Орталықты көп басқара қоймаған оның орынына Алтай Стамқұлов келді. Оның да басшылығы көпке созыла қоймады. Осылайша, орталыққа жақында ғана басшы ретінде Эльмира Асқарова тағайындалып отыр. Сондықтан бұл тағайындауларды сәтті деп айта алмаймыз. Сондай-ақ осымен қатар жергілікті полиция бөлімін басқарған Қаныбек Төлешовті де қосуға болады. Себебі, оның жұмысы қалалық мәслихат және қоғамдық кеңес отырыстарында жиі талқыланып, тірлігі көңілден шықпай жүретін. Ақыры ол жұмысынан кетіп тынды.
Кетуге не себеп?
Ол жағы бізге белгісіз. Дегенмен, Рүстем Дәулеттің облысқа іскер басшы келгеннен кейін оның жұмыс жүйесіне ілесе алмауы да мүмкін. Себебі, бүгінгі күні облыс орталығында бірқатар тірліктер қолға алынып, жасалынуда. Ал олар уақытында жасалуы керек. Сондықтан облыс басшысына да өзінің ойындағыдай тірлігі тез адам керектігі де сөзсіз. Дегенмен шаһарды бір жылдан аса басқарған Рүстем Рысбайұлының жұмысына ешкім аса мін таға алмайды.
TURANINFO.KZ
