Облыстық білім беру басқармасының мәліметінше, 23 қаңтар күні сағат 09:00-де Павлодар облысы Ертіс ауданының Бұланбай ауылындағы Бұланбай негізгі жалпы білім беретін мектебінің 2010 жылы салынған жеке тұрған бір қабатты бейімделген ғимаратында өрт шықты.
«Алдын ала нұсқа бойынша өрттің себебі – екпінді желге байланысты жақын тұрған бағананың қысқа тұйықталуы. Өрт 153 шаршы метр аумақты шарпыды. Мектеп ғимаратын визуалды тексеру өрттің салдарынан ғимараттың толығымен өртеніп кеткенін және қалпына келтірілмейтінін көрсетті. Құрбандар мен зардап шеккендер жоқ», — деп хабарлады басқарма.
Ертіс ауданының Бұланбай мектебінде 20 оқушы білім алады.
Оқушыларды одан әрі орналастыру және оқу процесін ұйымдастыру мәселесін шешу үшін аудан әкімі мен Павлодар облысы білім беру басқармасының басшысы оқиға орнына жетті.
Сол жерде ауыл тұрғындарының жиыны өткізіліп, оқушылардың ата-аналарының өтініші бойынша Бұланбай негізгі жалпы білім беретін мектебінің оқушыларын осы ауылда орналасқан шағын орталық ғимаратына уақытша орналастыру туралы шешім қабылданды.
